Shillong: Hadien ba ladep ban aiti ia ki trok kit niut ia ki shnong ki thaw kiba hap hapoh ka jingpeit jong ka District Council, kaba dei shibynta jong ka project THE KHASI HILLS AUTONOMOUS DISTRICT (SOLID WASTE MANAGEMENT) ACT, 2020, mynta ka kynti ka Dorbar shnong Nongrah ka la ioh ban pdiang ia kawei ka trok kit niut.
Ia kane ka trok kit niut, la pyllait paidbah bad la khap ia u ribbon da u CEM ka KHADC bah Pyniaid Sing Syiem, ryngkat ka jingdonlang ki rangbah shnong, rangbah dong, ki longkmie, ki samla bad ki paidbah.
La iathuh ba ka don tang kawei ka trok ha kane ka shnong bad dei namar ka trok ka la rim bad bun tang ki jingshna na ka liang ka shnong ka la kynduh ia u CEM bad tang hapoh 1 bnai, la lah ban pynioh ia kane ka trok kit niut.
Ha kane ka sngi, na ka liang u CEM u la pynbna paidbah ba namar ka jingdon ki jingud jingnam na ki paidbah ha kine ki sngi ba ladep, na ka liang jong u, un ai ia ki scheme sha kane ka shnong ban shna pynbha ia ki surok, ban shna ia ka footpath, ban pynieng ia ki post electric, ban pynbiang ia ka um bam um dih bad ban pynieng noh da ki CCTV camera na ka bynta ka jingshngain jong ki nongshong shnong.