Shillong: U Rangbah Shnong ka Umsaw Mawjynrong u bah Rapborlang Mawthoh u la pynpaw ba ka jingdon ryngkat u bah PT Sawkmie ha ka sngi rakhe lypa ia ka sngi ki khynnah ne ka Children Days ka la pynlong ia ki ba kin sngew ba u dang dei u MLA bad u MDC jong ki.
U pynpaw ia kane ha ka sngi rakhe lypa ia ka sngi ki khynnah kaba ju rakhe ha ka 14 tarik u Naiwieng ba la pyniaid da ka Iaitreilang Village Organisation, Aganwadi bad ka Village Health Council (VHC) jong ka shnong Umsaw Mawjynrong ba la pynlong ha madan shnong ha ka sngi Saitjain ka 09 tarik u Naiwieng, 2024.
U rangbah shnong u la pynpaw ruh ia ka jingsngew shngain kaba khraw da ka jingdon ryngkat u bah PT Sawkmie bad u la ai khublei ia u, kumjuh ia ka National Rural Livelihood Mission (NRLM), ia ki kmie ki kpa kiba la ia don ryngkat ha kane ka sngi rakhe ia ki khynnah.
U kyntu ia ki hep barit ban kiar ia u drok, uba pynsniew ia ka jingim jong ki, kumjuh u Duma, uba ktah ia ka koit ka khiah jong ki.
Katba na ka liang u bah Sawkmie uba long kum u kongsan u la pynpaw ia ka jingsngewkhia bad jingsngewbynnud jur ba ki don ki Self Help Group kibym shym la lah shuh ban treikam na kadaw ki jingeh ba ki mad.
Ha kajuh ka por u u la kitbok ruh ia ki khynnah na ka bynta kane ka sngi kaba kmen jong ki bad kumjuh u la iaroh ia ki sap shad bad rwai ba ki khynnah ki don.
La pyniphuh ia kane ka jingrakhe da ki jingrwai bad jingshad jong ki heprit kiba la pyni ia la ki jong ki sap ki phong ba ki don.
La ioh ruh ia ka jingkren jong ka President ka Iaitreilang VO, ka kong M. Nongkynrih bad na ka kong D. Kharjana kaba la pynpaw ia ka jingsngewnguh ia u bah Sawkmie halor ka jingnohsynniang jong u sha ki, kiba la lah ban pynurlong ia kane ka jingrakhe.
Dang sngew u RS Umsaw Mawjynrong ba dang dei MLA, MDC u bah Process
