Shillong: Ka phyllaw ka skulbah North Eastern Hill University (NEHU) kala kylla jaka thiah miet na ka jingiakhih shah thngan khlem pud jong ki samla pule ban dawa weng mardor ia u Registrar bad Deputy Registrar ka NEHU.
Ia kane ka jingiakhih la iashim bynta ki samla ka NEHUSU bad ka KSU NEHU ban pynbor ba u Vice Chancellor u Prof. Prabha Shukla Shankar u dei ban weng noh ia kine ki ar ngut.
Hynnin ka sngi, ki samla pule kila iania dain bad u Vice Chancellor ha kamra jongu, haduh ba kila mih jyndat noh namar ba u Vice Chancellor um ai ia ka jingkular kumba la dawa.
Ki nongialam ka KSU sengkmie ruh kila leit jngoh mynmiet sha NEHU ban ai mynsiem ia ki samla pule bad kumjuh ki nongialam ka Meghalaya Tribal Teachers Association bad ka NEHUTA.
Shwa ia kane, ka NEHUTA ka seng ki nonghikai, ka la dawa ba dei ban weng noh ia u Registrar bad Deputy Registrar ha kaba, kila kynnoh ba la shu thung hi u Vice Chancellor namar ba une u Registrar um don ka jingbit ban treikam.
Kylla jaka thiah miet ka NEHU ba shah thngan ki samla ban dawa weng ia Registrar, Deputy Registrar
