Mawkyrwat: Ka South West Khasi Hills District ka don shibun ki jingitynnad bad kaba shongsuk shongsain bha, hynrei kine kim lah ban tan ia ki nongwankai namar ka jingsniew tasam ka surok.
La thaw ia ka South West Khasi Hills District ha u snem 2012 kaba kynthup ia ka Mawkyrwat bad ka Ranikor konstitwensi bad lah ban ong ba ka dei ka District kaba dang lung bha ban ianujor bad kiwei pat.
Watla ka dei ka district ka dei kaba shong suk shong saiñ bad ka jingdon jong ki jingbuh jingsat ka mariang kiba itynnad hynrei, kawei ka daw kaba pynsep ei ia ki jingitynnad jongka, ka dei namar ka jingsniew palat ka surok ka sniew bad khim bha.
Ha ka jingiakren ki nongthoh khubor, u Deputy Commissioner u bah Bandary Mawlong bad u Deputy Superintendent of Police bah D Mawleiñ, kila pynpaw ba ka jingkhohrum khohram palat ka surok, ka la long kawei ka daw kaba ktah bha khamtam ha kaba iadei bad ka kam jngohkai pyrthei.
Ka jingdon ka um khluit, ka mawranglang, ka phlangkynshi, ki ksaid, ki mawbynna bad kiwei ki dei ki jingbuh ka mariang kiba itynnad ban khring ia ki nongwankai, pynban ka surok na Tyrsad ter ter shaduh Mawkyrwat ka long kaba sniew bad khim ban iaid ki kali.