Phlangkynshi: Ka shnong Plangkynshi kaba jngai kumba 20 km eiei na Mawkyrwat, ka South West Khasi Hills ka dei ka shnong kaba kham kyndong bha hynrei ka don ka jingitynnad bad shynna bha ban iohi sha them wat shaduh Bangladesh.
Kane ka shnong ka la ioh ia ka surok naduh ki snem 1960 eiei hynrei ka dang ioh surong rong dang shen tangba ha mar ba poi ha shnong, ka rong ka la kut noh bad sah ka surok khyndew.
Ha ka jinghiar ki nongthoh khubor ha ka jingialam ka tnad Directorate of Information and Public Relation (DIPR) ka sorkar Meghalaya, la shem ba kane ka shnong ka don hajrong riat bad sha them, ka don ki riat kiba jrong bad ki don ki bri ki bsah jong ki briew kiba leit rep ia ki mar rep jongki bd kit da ka bor met.
Ha syndah ka shnong, ka don ka rynsan peitkai jong ki nongjngohkai kaba la shna da ka shnong na ka skhim 100 sngi ha ka jinglut kaba 9 lak tam eiei bad kawei pat ka don kaba dang shna ha shiteng riat. Kane jingmut jong kane ka rynsan peitkai, ka long ban khring ia ki nongwankai sha kane ka shnong namar ka jingitynnad ka mariang, ban bam lyer pynngad bad peit iapbiej ia ki them ki wah.
U rangbah shnong ne u myntri kiba khot sha katei ka thain, u bah Polos Marngar u la iathuh ba ka skhim kaba la pynphuh pynphieng ia ka shnong ka dei tang ka skhim 100 sngi ne ka MGNREGS ha kaba ka shnong ka ioh ban shna ia ki lynti syngkieng, bad kiwei ki jingshna ban myntoi ki nongshong shnong.
U Myntri ka shnong u la ong ba ka shnong ka la mih ia kane ka jingmut na bynta ban shna ia kane ka rynsan khnang ban khring ia ki nongwankai na bynta ka jingmyntoi ka shnong tangba kam pat lah ban pyndep hynrei ki briew kila sdang ban wan peitkai.
Ka rynsan peitkai ha kliar riat ha shnong Phlangkynshi
