Kenmynsaw: ‘Ha ki kam bani baroh, dei hangta ka rieh ka nam’, ka ktien jong u Myllung ba Khraw ka jaitbynriew u Paieid Soso Tham.
Kane ka ktien ka iahap bha ia ka sap kaba don jong ki briew ka shnong Kenmynsaw Syntein kaba don ha thain Mawsynram namar ka sap kaba ki don ha ka thain shang, thain khoh, thain kriah bad kiwei ki jingthain kti, ka la khring kylleng ban ioh sngew ia ka nam jong kane ka shnong.
Ka shnong Kenmynsaw Syntein ka jngai kumba 12 km eiei na shnong Mawsynram bad 72 km na Shillong ha kaba hap ban shu hiar arsut ha ka surok dewbilat ban poi sha kane ka shnong, bad hap ban iaid pat khyndiat ban kam ia ka kam namar ba ka surok kali kam pat poi haduh shnong.
Katkum ka khanasumari 2011, ka shnong Kenmynsaw ka don 1,041 ngut ki nongshong shnong bad kumba 200 duna ki tnum iing.
Ka shnong kaba don ha sharing lum ha ka syndah ka wah, kaba pynsuk ia ka sum ka sait. Ki briew ki im ha ka rep ka riang kumba long sha ki thain war kum ka rep sohmrit, sla tyrpad, synsar bad kiwei kiwei. Hynrei kaba kham pawnam tam bad kaba la khring kylleng ia kane ka shnong, ka dei ka jingpawnam jongka ha ka thain shang thain kriah bad kane ka kam ka dei kaba bsa kaba pjiah ia ki jingdonkam ka iing ka sem khamtam haba ki mar rep kum u synsar u la tad dor ha kine ki sngi.
Kaei kaba pyllong ia kane ka shnong ban paw ha kane ka kam, ka long namar ba watla, ki don bun ki shnong kiba nang ban thain kriah thain shang, shna knup, shna khoh, mula, bad kiwei hynrei, ka jinglong ni bad ka jingjlih bad ka jinglong skhem jong ki jait jingthain kiba shna ki briew ka shnong Kenmynsaw ka la pyllong ban iapher na kiwei pat ha ka jinglong bha ne ka quality.
Kane ka shnong ka la paw ruh haduh ka ri India ha ka kam thain kriah thain shang bad ban kham tip kham bha, la ioh ban iakren bad I kong Shruda Kynter iba dei iwei iba la pawbha ha kane ka kam bad iba la ioh khusnam ruh na ka sorkar.
I kong Shruda ila nang ban thain kriah naduh ba I dang 13-14 snem ila nang ban thain na ka jinghikai I mei bad I pa jongi bad ila bteng ia kane kam haduh mynta. Ila iathuh ba la sdang nyngkong ban thain ia ka khoh ka trap bad ka knup hynrei kham hadien ba ila kham tbit, ila ioh lad ban ioh jinghikai na ki bor sorkar ban thain sa kiwei kiwei ki jingthain ban buh itynnad ha iing bad ha kiwei ki jingdonkam.
La pyniaid iew ia ki tiar sha sor Shillong bad sha kiwei ki jaka bad ki don kiba order nabar jylla ruh. Ila ai jinghikai ruh ia kiwei bad kila lah ban ai kam ai jam ia ki nongiarap ha kane ka kam.
Ym tang ha kane ka bynta, hynrei kane ka shnong ka don ruh ki wah ki ksaid, kiba itynnad ha kaba lah ban khring ia ki briew ban long ka jaka jngohkai. Ka jingshna iing jong ki briew ha ki riat ki sharing kumba long sha Sikkim ne Himachal Pradesh, kan long kawei kaban khring ia ki nongwankai nalor ki wah kiba khuid, bad kiwei ki jingitynnad ka mariang.
Ki thwei kiba khuid, kiba kynshaid pum pum, kila khring ia ki samla kynthei bad shynrang bad kiba la kham met iaw ban wan jngi pynngad khamtam haba shit ka suin bneng.
‘Ha ki kam bani baroh, dei hangta kein ka rieh ka nam’
