Shillong: U Member Secretary ka Meghalaya State Pollution Control Board (MSPCB), u Dr GH Chyrmang u la ong ba ym lah ban pynsangeh ia ka jingpynsngew paidbah lane ka public hearing jong ka karkhana pynmih dewbilat lada ym don kano kano ka hukum na ka Kashari.
Hynne ka Sngi ki nongialam ka FKJGP, East Jaintia Hills Unit ki la leit ban kyntu ia ka MSPCB ban nym pynlong ia ka public hearing jong ka karkhana dewbilat thymmai, ka Meghalaya Top kaba la bun ban long ha ka 18 tarik mynta u bnai Risaw ha East Jaintia Hills.
Haba iakren bad u heh ka MSPCB, u la ong ba tang lada ioh ia ka hukum na Kashari bad lada don ki jingjia lynshop mariang lah ban pynsangeh ia ka public hearing.
U Dr Chyrmang u la ong ba ka Megha Top ka la ioh ia ka environmental clearance, bad kane ka kam ka iaid na ka Ministry of Environment and Forest ka Sorkar pdeng, bad katkum ki kyndon ki la ioh ia ka jingbit bad ka shong ha ka State pollution control board ban pyniaid ia ka public hearing da ka jingiatreilang bad ka ophis u Deputy Commissioner.
U la ong ba tang da ka public hearing ym pat lah ban ai ia ka CTE (Concent to Establish) lane ka CTO (Concent to Operate), bad ka board kam don bynta ban pynksan rai eiei namar ia ka public hap ban buh thik pathik da ka jingthoh bad ring dur ruh ia ka jingiakren ban phah pat sha ka Ministry.