Shillong: Ka seng ki samla pule jong ka Khasi Student Union (KSU) lyngba ka Monitoring Employment Cell hapoh ka jingïalam u samla Ruben Najiar, ha ka janmiet sngi Nyngkong ka 14 tarik Risaw 2024 ki la leit ban ïakynduh ïa u Secretary jong ka Personal And A.R u Bah Cyril V Diengdoh.
Ha katei ka jingleit ïakynduh ka seng ka la aiti ruh da ka dorkhas jong lai tylli ki mat kaba kynthup ka jingthung ïa u Guitar instructor hapoh ka tnad Arts and Culture, ka jingpynrung kam ha ka tnad Directorate of Forensic Science bad jingkyntiew kyrdan ïa ki nongtrei na kawei ka tnad sha kawei pat.
U samla Ruben Najiar uba dei u Chairman ka Monitoring Employment Cell haba kren sha ki lad pathai khubor, u la ong ba ka sorkar ka la ïaid lait ïa ka roster halor ka jingthep kam ha ka tnad Art and Culture. U la ïathuh ba hadien ba la shongthait noh u Khasi na ka kam, la thung pat da u Jaitbynriew Garo ha kaba ka seng ka pyrshah jur.
Ha kaba ïadei pat bad ka jingpynrung kam ha Directorate of Forensic Science, ka seng ka la ong ba ka sorkar ka la ïaid lait na kaei kaba la don lypa bad khatduh ka seng ka buh jingkylli halor ka jingkyntiew ïa uno uno u briew uba don ha ki kam bapher bapher sha ka kam Civil Service.