Brichyrnot: Ki paidbah nongshong shnong ka Brichyrnot kaba don 63 tylli ki tnum iing bad kumba 400 ngut eiei ki nongshong shnong, East Jaintia Hills kila iatylli mlon ban kyrshan ia ka kompeni Star Cement ba kan pyniar ia ka jingtih mawshun ha katei ka jaka, kaba heh kumba 65 hectare.
Ha ka jingsngap paidbah kaba la long ha shnong Brichyrnot ha kane ka sngi Baar, ki paidbah shrup ka shnong kila pynpaw ka jingmynjur lait noh tang kumba 1 percent duna kiba pyrshah, ki bym dei na ka shnong. Napdeng ki 30 ngut ki nongkren ha katei ka jingialang pynsngew paidbah ki don tang 4 ngut kiba pyrshah kynthup ia ka seng KSU Narpuh ba la kren da u President ka seng u bah Kwilness Suchiang.
Ia kane ka jingsngap paidbah ne ka public hearing la pyllong ka Meghalaya State Pollution Control Board (MSPCB) kaba la pyniaid u ADC ka District, u bah Gautam Warjri, kum u chairman ha ka jingdon lang ki enjiniar mariang kynthup bah S Syiem bad bah YF Laloo bad ki heh ka kompeni Star Cement nalor ki paidbah ka shnong, bad kiwei.
Ka kompeni Star Cement ka la pan jingbit ban pyniar ia ka maw tih mawshun ha katei ka thain shi bynta na ka projek thymmai jongka, bad ha ka jingiateh bad ka shnong Brichyrnot, ia ka soskular yn pynthymmai man ka san snem haduh ba ka kompeni ka dang kwah ban bteng ban khlong ia u mawshun.
Katkum ka jingiathuh u Waheh Shnong ka Brichynot bah Stanly Massar, la iateh ba ka kompeni Star Cement kan theh ia ki kam pynroi ha ka shnong, naduh ka jingbuh skul ei ia ki khynnah, ka jingwanrah ia ka lad jingsumar, ka um bam dih, ka ioh kam ioh jam bad kiwei ki jingdonkam jong ka shnong. U la ong ba wat mynta ym pat don ka jingtih mawshun, hynrei ka Star Cement ka la wanrah shibun ki kam pynroi ha ka shnong bad baroh ki nongshong shnong bad ki shnong ba Marjan ruh ki kyrshan namar ba ki tip ba ka jingtih ka Star Cement ia u mawshun kan wanrah ia ka jingmyntoi ia ki.
U Assistant General Manager (AGM) ka Administration Department ka Star Cement, u Siddharth Banerjee u la ong ba ka kompeni ka la pynkhreh nadong shading ia ki plan kumno ban tih ia u mawshun ha ka rukom kaba phikir bha, ban ym pynjot ia ka mariang bad ki kynja jingim baroh, namar ba ka par ban tih mawshun ka jngai kumba 2km na ka Narpuh Wildlife Sanctury.
U la ong ba ha ka jingsngap paidbah, la iohi ia ka jingkyrshan shitrhem ki nongshong shnong ka Brichyrnot bad ki shnong Marjan na bynta kane ka projek ka Star Cement. U la ong ba ki don ruh ki bym lah ban wan sha ka jingsngap paidbah, kila ai ia ka shithi ba ki kyrshan ia ka kompeni.
U la ong ba ki don tang uwei ne ar kiba pynpaw ia ka jingsngew pyrshah bad pynpaw ia ka jingsngew khia ia ka mariang.
U la pynpaw ba ka kompeni ka long kaba phikir bha ia ka mariang bad kan tih katkum ki kyndon ain.
Iatylli ka shnong Brichyrnot ban kyrshan ia ka Star Cement, pyrshah tang 1 percent ban tih mawshun
