Shillong: Lada ia kren shaphang ka Phutbol hangne ha ka jylla, baroh baroh kaba ki briew kiba ieit bad ba sngewtynnad bha ia ka Phutbol lehse kim lah ruh ban klet ia la ki jong ki khlur ialehkaiu kiba tbit bad kiba kynsai kiba ka jylla ka la sei ha kaba don napdeng jong ki, kiba la bam kwai noh ha dwar iing u Blei ne don pat kiba dang trei dang ktah.
Uwei na ki rang ialehkai uba ka nam ka kyrteng ka jong u ka iai im bad iai suhsien sah haduh mynta mynne dei u bah Agustine Kharkongor ba hynne ka sngi, u la wan ban ia skahi lang shipor ia ka jingiakhun jong ka quarterfinal ka lympung Meghalaya Youth League, kaba la pynlong ia ka da ka Meghalaya Football Association ha madan MFA Turf Third Ground Polo.
Haba iadei bad kane, u t7 u la ioh ia ka lad ban iakren bad bah Agustine ha kaba u la ai khublei ia ki nongkitkam ba mynta jong ka MFA, kiba la shim ia kum kane ka sin jam ban pynlong ia kane ka lympung jong ka youth league kaba dei ruh ha ka dur jong ka Inter District, ha kaba u kyrmen ba dei lyngba kane ka lympung, ba kan sei ia ki khynnah ialehkai kiba tbit bad ba kynsai ban ioh ban mihkhmat ia ka jylla.
Ym lah ban len ba hadien ba u bah Aguistine u la shongthait u la long u nongkitkam ba shitrhem bha jong ka Meghalaya Football Players Association ne ka MFPA, kaba ma u lem bad ki paralok ialehkai kiba la ia shongthait ba ki la shim ia ka sien jam ban pynlong ia la ka lympung uialehkai kaba kyrpang, kaba na kane ka lympung la sei shisha ia ka spa ba nylla jong ki khynnah kiba la bteng ka jingim ba kin ialehkai haduh ka Indian Super League mynta.
U Bah Agustine u kyntu ia ki khynnah ba ialehkai ha ka Youth Legaue ba kin pyndonkam hok uia kane ka kabu kaba ki ioh ha ka jingim d akaba kin hap ban minot bad trei shitom khnang ba kin lah ban kynjoh sha ka thong ha ka jingim bad katta hi kan long kum ki rang ialehkai ba kynsai.