Shillong, Risaw 07: Ka seng ka Voice of the People Party (VPP) ka la ujor sha u Commissioner & Secretary ka tnad pule puthi ka jylla u Vijay Mantri, pyrshah ia ka rukom pyniaid ia ka eksamin Assistant Professor ha ka Physical Education, namar ba ka Directorate of Higher and Technical Education ka la khot pyniaid na ka tnad ialehkai ha jaka ban khot da ki stad na ki skulbah katkum ka kyndon ka University Grant Commission (UGC).
Haba kren mynta ka sngi, u MLA ka Mawlai u bah Brightstarwell Marbaniang u la ong ba katkum ka UGC, ban pyniaid ia ka eksamin, dei ban khot da ki stad na ka skulbah bad u la ong ba kane ka jingkhot ka sorkar ia ka tnad ialehkai ban pyniaid ia ka eksamin kam iahap satia.
Ha kajuh ka por, ka VPP ka la pynsngew ruh halor ka jingpyllait shiliang ia ka Death cum Retirement Gratuity (DCRG) ia ki nonghikai kiba la shongthait na ka kam namar ba ka sorkar kam shym la pyllait ryntih haduh mynta.
Katkum ba ka dei ban long, ki nonghikai hadien ba kila shongthait ne ki khlad noh shiteng por, kin ioh ia kane ka jingsiew kaba shisien na ka sorkar kaban long T.10 lak hynrei ki don kiba khlem pat ioh satia bad don pat tang katto katne kiba la ioh bad kane ka paw ba ka dei ka jingleh shiliang ka sorkar.
U la ong ba kawei pat ka jingiapher ka rukom siew tulop namar ba ki nonghikai kolej haba ki rung kam hikai ki dei ban ioh katkum ka University Grant Commission (UGC) Pay Scale hynrei kaba lyngngoh ka long ba ka sorkar ka siew da ka state pay scale. Ka seng ka la pynsngew ruh ba dei ban ai ia ka increment ia kiba la pyndep ia ka jingpule PhD bad kumjuh ban weng noh ia ka jingbuh kyndon ia ka rta rung kam nonghikai ha ki kolej namar ba katkum ka UGC Norm, kam don satia ka jingbuh rta ia ka kam nonghikai Assistant Professor ha ki college.
Ka la dawa ban pynsted ban ai ia ka jingpynskhem ia kiba la rung kam namar ba don ki nonghikai kiba la hikai la lai snem ruh kim pat ioh satia haduh mynta bad ban pynsted ban pyllait noh ia ka arrear jong ki nonghikai.
Ujor ka VPP phah pyniaid eksamin ka DHTE ha ka tnad ialehkai: kiba iajan ki ioh kloi iaka T.10 lak
