Shillong: Ka seng sain pyrthei ka Voice of the People Party (VPP) ka la ai jingmut sha ka Expert Committee On State Reservation Policy Meghalaya ba ia ka jingbhah kam hapdeng ki Khasi-Jaintia bad Garo ha kane ka jylla Meghalaya, dei ban pynshong Nongrim katkum ka jingdon briew jong u snem 1972, kaba kren shai ba ia ka jingbhah kam, ka dei ban long katkum ka jingbun paid.
U nongaiktien ka VPP mynta ka 5 tarik Risaw 2024, u bah Batskhem Myrboh u la ong ba ka sorkar kam shym la pyntreikam satia ia kane ka kyndon kaba la buh naduh katei ka snem.
U la ong ba ki Khasi ki don 45 percent katba ki Garo ki don 32 percent hynrei ki ai lang mar 40 percent katba ia kiwei ki Schedule Tribe, Schedule Caste kiba don ha kane ka jylla, ki ai haduh 5 percent bad kane ka jingleh kam long kaba shongnia satia. U la ong ba ia jingbhah kam dei ban shim ia u snem 1971 kum ka snem ban pynshong nongrim ia ka jingdon ki briew ha kane ka jylla.
Halor ka jingong jong ki katto katne ba ym dei ban shim ia ka jingbun paid, u bah Batskhem u la ong ba lada ym shim ia ka jingbun briew, kaei pat yn shim. U la ong ba ha u snem 1961, ka sorkar India ka la bhah kam katkum ka jingbun briew ia ki ST bad SC. U la ong ula ther ia kiba ong ba ym dei ban bhah kam katkum ka jingbun briew da kaba ong ba lada ym shim katkum ka jingbun briew, hato yn shim noh tang na ka jingphoh sniew.
Lada ym shim ia ka jingbun briew, hato yn shim noh tang da ka jingphoh sniew: VPP
