Shillong: U MLA bad MDC barim ka Mawlai, Bah Process T Sawkmie u la pynpaw ba ka Mawlai Konstitwensi ka donkam ia u MLA, MDC ki bym dei na ka juh ka seng sain hima khnang ba kin lah ban kyntiew ia ki kam pynroi hapoh ka thain.
U bah Sawkmie u la pynpaw ia kane ha ka sngi ba u la aiti ia ki tynghung pyrta shnong ne PA System kiba kynthup ia 8 tylli ki tynghung bad u mouth piece sha ka dorbar shnong Mawlai Umthlong hapoh ophis treikam jong ka ha ka 05 tarik u Risaw, 2024.
U la pynpaw ruh ia ka jingsngewkmen ba ki paidbah nong Mawlai ki dang kynmaw ieit ia u watla um long eiei shuh.
U Rangbah shnong u bah Shaphrang Mylliem Umlong u la ai khublei bad pynpaw ia ka jingsngewnguh ia u bah PT Sawkmie uba la pynioh ia kine ki tiar pyrta shnong, kiba ki donkam bha, na ka bynta ban ai jingtip ia ki nongshong shnong halor ki jingdonkam ka shnong.
Ha kajuh ka por u la ong ba kumba 70 percent ki kam pynroi ha ka shnong ki dei ki matti bah Process ha ka por ba u long kum u nongmihkhmat.
Ha kane ka jingialang balyngkot la ioh ruh ia ka jingkren na ka president seng longkmie Mawlai Umthlong ka kong P. Khongwar ha ka jingdon ryngkat ki dkhot seng longkmie, ki dkhot dorbar shnong bad kiwei kiwei.
Ha Mawlai donkam MLA, MDC ym na kajuh ka party: PT Sawkmie
