Shillong: Ki tnat treikam jong lai tylli ka Khasi Students Union (KSU) kiba kynthup ïa ka KSU Sawsymper Circle, Balat Border Area Circle bad ka Lawbah Border Area Circle kila wan kiew sha Shillong na Mawsynram ban kham pynjur ia ka jingiakhih ban dawa na ka sorkar ban ai noh ia ka Civil Sub Division na bynta ka Mawsynram.
Ki dkhot ka KSU kila pyllong ia ka jingiashong kyraiñ ha madan Malki, Shillong mynta ka sngi ryngkat ki banner bad placard ba ka Mawsynram Community and Rural Development Block ka la dei hok ban pynkiewkyrdan noh sha ka Civil sub-Division.
U President ka KSU Circle Lawbah Border Area Circle u Samborlang Shabong u la ong ba ka Mawsynram Block ka la biang nadong shadong ba kan kiew kyrdan noh bad ka dei ruh kaba rim tam ha ka jylla.
U la ong ba ka sorkar bad ki nongmihkhmat ki dei ban sangeh noh ka jingleh politik ban pynheh nia tang ha ka por elekshon katba ki kam khlem urlong eiei.
U la ong ba ka KSU kan nang bteng ban iakhih nangne shakhmat da kiwei ki sienjam lada ka sorkar ka dang iai mynthi ban pynurlong noh ia ka jingdawa.
Kiew ka KSU Sawsymper na Mawsynram sha Shillong ban dawa Civil Sub-Division
