Shillong: U myntri khynnah ka sorkar pdeng ba peit ia ka tnad Skill Development and Entrepreneurship, u Jayant Chaudhary ula ong ba ka donkam ban pynkhreh ia ka shlem hikai na bynta ban pyntbit ia ki sap jong ki samla ka thain shatei lammihngi ka India ha ki jait bapher bapher.
Haba kren ha ka jingialang ka North East Skill and Entrepreneurship Conclave 2024 kaba long mynta ka sngi ha IIM, Shillong, u Chaudhary ula ong ba ki jylla ka thain shatei lammihngi ka India ki don thong bapher bapher bad ki rukom kyntiew ia ka sap jong ki samla.
U la ong ba ka donkam ia ka jinghikai kaba bun jait bad katkum ka jinglong jong ka thain namar ba ban shu pyllong kyllum lut kawei kam long kaba biang ha ka India kaba bun jait.
U myntri u la ong ba ka sorkar pdeng kam dei ban thombor bad iuhroit ia ka syrtap synshar paidbah jong ka ri bad ka donkam ka jingiatreilang hapdeng ki jylla bapher bapher.
U la ong ba ki jylla ki don la kajong ka tnad kaba peit ia kane bad ha ka sorkar pdeng ia kane ka tnad dang pynwan dur bha ha kine ki shiphew snem ba la dep.
Halor ki Industrial Training Institutes (ITIs), u myntri u la ong ba ka sorkar pdeng ka la mang pisa kyrpang bad kyntiew kyrdan ia ki 1000 tylli ki ITI ha ka ri.
U la ong ba ka donkam ia ki stad halor ki jait kam bapher bapher ban ai ia ki jingmut jongki ban pynbha ban pynkhlain ia ki ITI.
Ha kajuh ka por, u la ong ba ula ioh pdiang na ki sorkar jylla ban phah ia ki kynhun ban leit iashim bynta ha ka World Skills Competition ha Lyon, France.
Donkam ka shlem kaba biang ban phrang ia ki sap jong ki samla, ong u myntri
