Shillong: Ki lai tylli ki Autonomous District Council jong ka Meghalaya kynthup ka KHADC, JHADC bad ka GHADC kila pan pisa 8 hajar klur tam na ka 16th Finance Commission na bynta san snem kaban wan.
Hadien ba la kynduh ia u Chairman ka 16th Finance Commission u Dr. Arvind Panagariya mynta ha Shillong, u CEM ka Khasi Hills Autonomous District Council (KHADC) bah Pyniaid Sing Syiem ula ong ba ka KHADC ka pan T.2641.54 klur, ka Jaintia Hills Autonomous District Council (JHADC) T.1019.60 klur bad ka Garo Hills Autonomous District Council (GHADC) 5042.30 klur. Ka jingpan pisa baroh ka la kot sha ka T.8877.51 klur na bynta ka san snem kaban wan kaban sdang naduh 2025- 2029.
La pntip ba kila kyrpad ia ka 16th Finance Commission ban pyllait noh ia ki District Council ban iaid lyngba ka ministry of Panchayati Raj hynrei ka dei ban phah ia ki grant lyngba ka Department of North Eastern Region (DoNER) lane ka North Eastern Council (NEC) namar ba ka ki district council ki hap artikil 244 R jong ka Sixth Schedule katba ka Panchayati Raj ka hap ha ka 243.
La tyrwa ruh sha ka Commission ba kan pynjynsur ia ka kyndon jong ka Untied Grant, ban ai jingiarap na ka revenue deficit grant ia ki district council bad ban mang pisa ban thaw ia ka town and village police ha kaba ka KHADC ka la pynkhreh ban thung 3000 ngut kynthup 1500 ki kynthei bad 1500 shynrang.