Shillong: Ka Deputy Commissioner ka East Khasi Hills ka Kong Rosette M Kurbah ka la pynjari da ka kyndon 163 BNS ban mana pyrshah ia kano kano ka jingiaid palat ia san ngut ki briew ha nongbah Shillong bad ha khapsor.
Ia kane ka hukum la pynmih mynta ka sngi 27 tarik Nailur 2024, hadien ba ka DC ka la ioh jingtip ba ka kynhun ki Hindu ka Gau Dhwaj Sthapana Bharat Yatra kan pyllong ia ka jingiaid yatra ha ka 2 tarik Risaw ban wan khlem ka jingpan jingbit, kaba lah ban wanrah ia ka jingthut ha ka shongsuk shongsain ha ka nongbah.
Ka DC ka la ong ba kiba ialeh pyrshah kin shah pynshitom katkum ka kyndon 223 BNSS bad kane ka hukum kan treikam noh mardor.
Ha kajuh ka por, ka DC ka la ong ba kane ka hukum kan ym treikam ia kito ki kynhun niam kiba la dep ioh jingbit ban iaid rally.
Lah ban kdew ba mynta ka sngi ka seng FKJGP ka la leit pan jingshai na ka DC halor ka jingthmu iaid rally kane ka kynhun Hindu, ha nongbah Shillong bad katkum ka jingiathuh, kam don satia kano kano ka jingpan jingbit na ka bor district halor kane.
Pynjari kyndon 163 BNS ka DC ba thmu iaid yatra ban dawa pynbna ia ka masi kum ka kmie
