Shillong:Ha kane ka juk stad, ka don ka lad ia kito ki shijur ki bym lah ban ioh khun, da kaba pyndonkam da kiwei ki lad ne kaba ki khot ka in vitro fertilization (IVF) centre ne ki test tube baby.
Ka daw ka lah ban dei ba ka kynthei kam lah ban pun ne ba u symbai u shynrang um long, bad mynta ki lah ban leit sha ka Seeds of Innocence centre kaba don ha Supercare, Shillong ba kin ioh khun da kaba shu shim ia u symbai jong ki shijur.
Ka Seeds of Innocence kaba na Guwahati ryngkat ka Supercare hospital, Shillong ka la plie ia ka centre mynta ka sngi da ka Dr. Emisaka Sumer, kaba dei ka Consultant Obgy and gynae, supercare ha ka jingdon lang u Raj bad kiwei na ka Seeds of Innocence.
Ka Dr. Emisaka ka la ong ba kane ka centre kaba plie ha Supercare kan dei tang ka jingiarap ia kito ki shijur ki bym ioh khun.
Kan iarap ha kaba kim donkam ban leit shaduh Guwahati bad ki lah ban ioh lut ia ka jingbatai tang ha Supercare.
Ka Dr. Emisaka ka la ong ba kane ki in vitro fertilization (IVF) centre ne ki test tube baby kila don kylleng bad ha Shillong la don katto katne tylli bad ka jingjop ban pynarmet ka la long kaba ai mynsiem.
Ka Dr. Emisaka ka la ong ba kane ka IVF ki hap ban iaid katkum ka ain, ha kaba ym lah ban shim symbai na kiwei lait noh na ki shijur, hynrei lada don ki jingjia haba u symbai um long na u shynrang ne kam long na ka kynthei, ki don kiba leh na kiba ai sngewbha ne ki donor.
Ka la iathuh ba ka jingdon ki bym lah ban pun ne armet bad kiba bun ki leh da ka IVF. Ka la ong ba na man ki 10 ngut, kawei kan don beit kaba donkam ia kane ka IVF. Kiba lah ban leh ia kane ka kynthei ka dei ban long ym palat ia ka 45 snem.
Ki bym seisoh ban armet, lah ban pynarmet lyngba ka jingstad IVF
