Shillong: Ka jingjia kaba khyllah kaba la pynkyndit iaka shnong ka thaw bad kaba la pynpait dohnud ia kiba haiing hasem, ba I khynnah ba dang 10 snem, ila phasi hi ialade.
Kane ka la jia ha shnong Thangshalai, ha ka thaiñ Mawryngkneng ha ka 22 tarik Nailur 2024, kaba dei ka sngi u Blei.
Katkum ka jingiathuh kiba haiing, ka daw kaba la pyllong ia ine I khynnah kynthei iba dang shong klas IV, ka dei namar ba ka hymen jongi, kam ai ia ka mobile haba ka por ba I pan namar ba ka la phah ia I ban khreh kot shwa.
Haba iathuh ia kane ka jingjia, I mei ieid jong ine I khynnah, I kong Airolin Kharumnuid ila iathuh ba ha ka sngi u Blei ha ka por 2 baje eiei mynsngi, ine I ksiew jong I, ila pan ia ka mobile na ka hymen hynrei ha kata ka por, ka hymen ka la ong ia I, ban khreh shwa ia ka kot namar ba ka don ka test hynrei mar kumta, ila phet sha jingthiah bad khang ia ka kamra.
Khlem kano kano ka jingpyrkhat ba in leh kumta, ka hymen ka leit sum shwa, bad I kmie jong I, bad kiwei ki iashong ha phyllaw. Baroh ki mut dur ba I thiah sngi hynrei phewse kam long da kumta.
Dei ynda la wan khot ka para ar kmie jong I, ban ialehkai hynrei haba I la khot, khlem don ba jubab eiei bad kane kala pyllong ia I, ban leit peit noh na jingkhang ïit nabar bad hangta ila iohi ia ka jingjia bad ila pyntip ia kiba don ha phyllaw.
Mar mar ki leit ban peit hynrei ka jingkhang ka khang bad kila kyndar haduh ba kan plie bad haba ki rung ha kamra kila lap ba ila phasi da ka jain da kaba teh na u dieng khainshi.
Kila pyrshang ban ot ia ka jaiñ ban pyllait im hynrei kam shym la seisoh shuh.
Kane ka jingjia, ka long kaba shyrkhei bad pynkyndit ia kiba bun khamtam ia ki kmie ki kpa ha kane ka pyrthei mobile. Ila iathuh ba ki ju ai mobile phone teng teng hynrei dei barabor.
Ha ka jingiakren bad u Secretary ka shnong Thangshalai u bah Iohstar Kharumnuid ula pynpaw ia ka jingkyndit halor kane ka jingjia, ka bym pat ju jia koit. Ula ong ba kane ka jingjia kan dei ka jingsneng bad ka jinghikai ia ki kmie ki kpa kumno kin nang ban pyndonkam ia ka mobile ia ki khun jongki, ha kane ka pyrthei ba u soitan u hiar thma ban pynjot ia ki briew.
U bah Iohstar u la ong ba kane ka dei ka jinghiar thma u soitan da ka mobile phone ia ki briew ym tang ia ki khynnah wat ia kiba la heh la san ruh bad ka la dei ka por ba kin kyndit bynriew na kane ka jingjia ba shyrkhei.
Na ka daw bym ai mobile phone, sdien phasi ka khynnah 10 snem
