Shillong: Ban pynphriang ia ka khubor pyrshah Ia u drok, uwei u samla Khasi ula rai ban iaid kjat na Itanagar ka jylla Arunachal Pradesh sha Shillong ka jylla Meghalaya.
Une u samla Khasi uba kyrteng u samla Welkinstone Shadap u la pyntip paidbah mynta ka sngi ha shillong Press club ba un iaid shim ia kane ka sienjam da ka kjat na Itanagar sha Shillong.
Haba kren bad ki lad pathai khubor, u samla Welkinstone u la pyntip paidbah ba u thmu ban iaid da ka kjat kum shibynta ban rah ia ka khubor pyrshah ia u drok ban sdang naduh ka 30 tarik nailur 2024.
U la iathuh ba u la iaid teng da ka kjat na Guwahati sha Shillong bad kumjuh na Nongstoin sha Shillong bad kane ka dei ka sien ba nyngkong ba un iaid kjat shabar ka jylla bad kane ka jingiaid kjat jong une u samla kan kynthup kumba 50 km ha ka shisngi bad yn pyndep haduh 8 sngi lait noh ha ka sngi u Blei.
50 km shi sngi yn iaid u samla na Itanagar sha Shillong ban pyrshah ia u drok
