Shillong: Haba don ka mon, ka don ka lynti bad kane ka la urlong ia u samla na shnong Malki, uba hapdeng ka jingduk bad ka jingtynjuh ha ka jingim, ula ioh ia ka lad ban pyndep ia ka kyrdan Degree.
Une u samla u dei u samla Skhemboklang Lyting, uba la shah pynkup burom hadien ba ula pyndep ia ka sobjek Philosophy. Ia kane ka jingpynkup burom la pyllong ka Evening School bad College ka St Anthony’s ia kiba pyndep ia ka jingpule graduation.
Haba kren bad une u samla ula iathuh ia ka khana kaba shoh mynsiem bha namar ba ha ka por ba u dang khynnah, u hap ban pep skul shipor haduh saw snem namar ka jingban ka jingduk nalor kata u hap ban peit lem ia ki para kiba dang rit bad u hap ban bylla.
Une u samla u la ioh mark 71 percent ha kane ka sobjek bad ula don ka jingthmu ban bteng ban pule ia ka post graduate lada ioh lad hynrei u sngew shem jingeh namar ba u hap ban kyrshan de sa ia ki para kiba dang rit.
Ka la poi ka por ula rai ban sangeh noh ban leit skul ban leit shah hikai treikam noh hynrei u la ioh mynsiem na ki kyntien ba I mei jong u, ila ai mynsiem ia u ban trei shitom, wat haba I pang ruh. U samla Skhemboklang uba ju im ka jingim kaba khuid bad kaba kut jingmut, u la ong ba kwah ban ai mynsiem lem ia ki para samla ba watla ki duk kim dei ban duh jingkyrmen namar ba u Blei un ialam lada ki im ka jingim kaba khuid bad kaba shida.
Watla ula duh noh ia I mei hynrei une u samla u la iai kynmaw bad bat ia ki kyntien jong I mei iba sneng ia u ba u dei ban trei shitom, ban iai shah, ban ai nguh ia u Blei ban iaid shakhmat. Ula ong ba baroh shi para ki iatreilang ban kyrshan iwei ia iwei pat bad uwei u para jong u, ula pyndep ia ka post graduate bad kiwei ki dang pule ha ki secondary school. Ha kajuh ka por, ula ai nguh ia ki bor pyniaid katei ka college, ia ki nonghikai kiba iai ai mynsiem ia u haduh ba un pyndep ia kane ka kyrdan.
Na ka pep skul, ioh lad u samla baduk ban pyndep ia ka degree na ki kyntien ki mei
