Shillong: U President ka MPCC u bah Vincent H Pala u la kam ba ki kam beain ka sorkar kila kynrei bha ha kane ka jylla ha kaba kano kano kaba kit, hap ban siew pisa da ki phew hajar.
Haba kren mynta ka sngi 20 tarik Nailur 2024, sha ki lad pathai khubor, u bah Pala ula kyrshan n ia ka jingdawa u Dr. Mukul Sangma ban thung da ka jingtohkit kaba khlain halor ka jingpyniaid dewiong beain bad drok beain ha ka jylla.
U bah Pala u la kam ba ka jingshalan beain ia u dewiong ka la sdang la 10 snem ba la leit bad kano kano kaba kit sha kane ka jylla bad kaba mih nangne na jylla, ki shah khrong pisa bad u la kynnoh ba ka kali kiba kit syiar na Guwahati sha Shillong hap ban siew 20-30 hajar shi trok pik up, lada kit dewiong na Jaintia Hills sha Guwahati hap ban siew 96 hajar tyngka, kiba kit mawshun na Jaintia Hills sha Guwahati hap ban siew 20 hajar tyngka bad kine ki don ha ki lad pathai khubor.
U la ong ba u kyrshan ia ka jingdawa u Dr. Mukul ban don ka jingtohkit halor kine ki kam beain bad ka jingtohkit kam dei ban long naduh 10 snem mynshwa haduh mynta.
“Nga kyrshan ia ka jingmut jong u Dr. Mukul Sangma ba dei ban tohkit bniah halor kine ki kam beain bad ka jingtohkit ka dei ban long naduh 10 snem mynshwa haduh mynta”, la ong u bah Pala.
Shi trok u dewiong hap siew T.96 hajar, ban kit syiar hap siew T. 20-30 hajar, u mawshun T.20 hajar, kynnoh u bah Pala
