Shillong: Ka Khasi Students Union (KSU) mynta ka sngi ka la sam ia ka kot lyngkdop na bynta ban pynsngewthuh ia ki samla bad ki paidbah halor ka jingdonkam ban pyllong ia ki tnad thungkam ka sorkar kiba khuid kiba suba.
Ka Seng lyngba kane ka kot lyngkdop ka kwah ban pynshai sha ki paidbah ia ki 20 tylli ki mat, kiba kynthup ia ka jingthung ia ki Chairman & Dkhot jong ka Commission kiba larkam bad ki bym don jingiadei bad ka sain pyrthei. Ka jingpynbna man la u snem ia ka jingdon jingem da u nongtrei MPSC. Ka jingthaw ia katnat peitngor bad pyrshah bamsap (Anti-Corruption Directorate), Ki nongaplai ki dei ban long ki nongshong shnong jong ka jylla Meghalaya bad ki dei ban nang ia ka ktien Khasi ne Garo ban lah ban aplai ia kano kano ka kam.
Nangta, ka eksamin kyllum (Combined Examination) na ka bynta ki kam kiba don kajuh ka jingsiew & kyrdan, Ka MCS/MPS & kiwei kiwei ki kam ban pynlong man la u snem. Ka Almanak kaba kynthup ia ki tarik ba kongsan na ka bynta ki eksamin ban pynmih da ka Commission, Ka jingpynpaw paidbah ia ki marks ba la ioh da ki kyrtong ha kino kino ki eksamin, kiwei kiwei ki test bad ka jingshim kylli markhmat (personal interview) na ka bynta kano kano ka kam ba la pynlong da ka Commission.
Ki Roll Number jong u/ka kyrtong ym dei ban pynkylla hapdeng ka jingpynrung kam, Ym bit ban don jingkylla ha ka rukom thung kam shisien ba la sdang ka jingpynrung kam, ka Carbon copy jong ka kot OMR ban pynbiang sha ki kyrtong, Ka jingpynrung kam, lah hap ban pyndep hapoh 6 bnai naduh ka tarik ba la pynbna, Ka jingpynduh noh ia ka Personal Interview na ka bynta ki kyrdan B, C & D.
Shuh ka la ong ba ka Kaiphod Treikam da ka MPSC ban pynbna paidbah, Ki kot jingkylli ki dei ban long kiba lah ban shaniah khnang ban lait na kano kano ka jinglait tuh jong ki jingkylli, Ka jingthaw ia ka Grievances Cell ha ka Commission, Ka Cadre ba kyrpang na ka bynta ka Meghalaya bad ka eksamin da ka kompiwtor na ka bynta ki snem ban wan.
Sam kot ka KSU ki 20 mat ia ka jingdonkam ka jingthungkam kaba khuid kaba shai
