Shillong: Mynta ka sngi, u Speaker ka iing dorbar thawain ka jylla u Thomas A Sangma ula jurip ia ka jingshna ia ka iing dorbar kaba dang iaid mynta ha Mawdiangdiang, New Shillong.
Hadien ba la pyllong ia ka jingjurip bun ki bynta jong kane ka jingtei ryngkat ki briew ka kompeni kaba la ioh ban shna, u Speaker u la ong ba ka kam ka la tyllun tangba ka suki, hynrei u sngew hun ban ioh ia ka jingtrei.
U la ong ba ka jingthmu ba kongsan jong ka jingwan jurip ka long ban pynthikna ba ka sawdong sawkun jong ka ing dorbar kan kup da ka rong ka rup kaba jyrngam da ki dieng ki siej bad ki syntiew ki skud bad ban pynwan dur ia ki bynta ban pdiang briew bad kiba shapoh ha ka dur katkum ka jinglong ka jaitbynriew ka jylla bad ula bthah ia ka tnad khlaw, tnad pynroi syntiew bad ka tnad Lariti ka jylla ban leh ia kane.
Kan don ruh ka jingring dur ia ka khana jong ka iing dorbar thawain ka Meghalaya ha kine ki 50 snem ba la leit.
Ha kajuh ka por, u Speaker u la ong ba watla ki don ki jingduna ki nongtrei hynrei ha kine ki sngi kin dang wan nabar kiba tbit kyrpang ha kaba iadei bad ka jingshna ia u tnum uba la khyllem noh mynshem snem.
Ha ka jingshisha, la buh ban pyndep ia ka jingtei ha u Nailur 2024 hynrei kam shym la urlong satia haduh kine ki sngi.
Lah ban kdew ba ka sorkar ka la buh thong ban pyndep ia ka jingtei ia ka iing dorbar thawain ha u snem ban wan, bad ban ioh shong dorbar syndon.
‘Ka kam ka la tyllun tangba ka suki, ngi sngew hun pat’, ong u Speaker hadien ba jurip ia ka Assembly
