Shillong: Hadien shi sngi ba kila jah, mynta ka 19 tarik Nailur 2024, ar ngut kynthup ka longkmie bad ka heprit la lap ia ki met jongki na wah NEHU kiba per ha sla um. La lap ia ki met jongki ha ka por 12:30 baje mynsngi eiei.
Kine ki ar ngut kiba la ioh tam na katei ka wah mynta ka sngi, ki dei i kong Nancy Riahtam bad I heprit Erika Thabah ba dang 5 snem karta.
Kine kila jah hynnin ka sngi bad ki briew kila iohi khadduh ha ka por 5 baje eiei janmiet ha ka thain ISBT Mawiong. Ia kine la iohi ki khynnah ki leit jngi ha kane ka wah, kiba la pyntip noh mar mar sha ka shnong bad hadien kata ka shnong ka la pyntip noh sha ki bor pulit ka Mawlai Police Station.
Katkum ka jingiathuh u bah Benedict Nongrum u Secretary Dong Tariang-A, u la iathuh ba kine ar ngut ki la mih na iing naduh kapor 10 baje mynstep eiei ban leit kai sha Mawiongrim ISBT Lumpyllon hynrei haduh janmiet kim shym la wan phai shuh sha iing.
Hadien ba kim wan phai shuh, kiba haiing jong kitei ki arngut ki la pyntip noh sha ka shnong bad ka shnong ka la shimkhia ban ia wad hynrei kim lap bad dei tad mynta ka sngi ba ki khynnah ba wan jngi bad sum ha katei ka wah ki la lap ia kine ki metiap arngut.
U la ong ba ka shnong ka shaniah beit ha ka tnad pulit namar ba ym tip ia kaei kaei kaba jia.
Hadien shi sngi, lap ia ki met ki 2 ngut ba per ha sla um ha wah NEHU
