Shillong: U symbud myntri rangbah ka jylla, u bah Sniawbhalang Dhar, u la pyntip ba ka tnad pynroi sor ka la mang T.5.8 klur ban shna pynbha ia ki lynti iaid kjat ha Iewduh bad T.15 klur ban pynbha dur ia kane ka iew kaba rim bha ha ka jylla bad kaba heh tam. U la ong ba ha kane ka jingpynbha dur thymmai ia ka Iewduh, yn pyniakhlad ia ka basa jhur, basa dohkha, bad basa jain.
Ia kane u la ong haba kren haka jingrakhe mynta ka sngi, ha ka prokram rakhe ia ka jingdap 10 snem ka Swachh Bharat Mission, ka Swachh Bharat Mission Gramin (SBM-G), Public Health Engineering Department (PHE) bad ka Swachh Bharat Mission Urban (SBM-U), Urban Affairs Department mynta ka sngi ka la pyllong ia ka ‘Swachhata Hi Seva’ ha Shillong.
Ka jingrakhe ia ka ‘Swachhata Hi Seva’ kaba ar taiew kan kut ha 2 tarik Risaw ban wan.
Ym tang katta, u symbud myntri rangbah ula ong ba ka thong jong ka sorkar ka long ban pynlong ia ka jylla Meghalaya kum ka jaka jngohkai kaba khring tam ha ka pyrthei hapoh san snem bad kane kan long kam lyngba ka Swachh Bharat Mission.
Shwa ia kane, la ioh ruh ia ka jingkren na ka kong R. M Kurbah, IAS, Deputy Commissioner, East Khasi Hills, ka la ong ba 70 tylli ki kali e-vehicle la mang ka sorkar ban thied bad 67 tylli kila poi bad kila treikam ban kit ia ki synrum na ki thliew iing.
La sakhi ha kane ka sngi da ka jingdon ki khynnah skul, ki nonghikai, ki samla pule college, ki NCC bad ki nongialam shnong bad ki dkhot jong ki SHG bad ka jingrwai na ka Jessie Lyngdoh.
T.20 klur tam yn pynbha ia ka Iewduh kynthup ki lynti iaid kjat, basa iew, basa doh, basa jhur
