Shillong: Ka Committee on Environment ka Meghalaya Legislative Assembly kaba ialam u Chairperson bah Wailadmiki Shylla, MLA ka la leit peit ia ka jingtreikam ki karkhana sain dewbilat bad karkhana sain rnga dewiong ne coke factory ha East Jaintia Hills District ban peit ia ka jingktah ia ka mariang.
Ki dkhot kane ka Committee kynthup u bah Mayralborn Syiem, MLA, bah Sosthenes Sohtun, MLA, bad ka kong Santa Mary Shylla, MLA, lem bad u C.P. Marak IFS (Retd.), Dr. W. Ryngkhlem, bad kiwei kila synran lang.
Ki karkhana ba ki leit peit ki long ka Jaintia Coke Pvt. Ltd. ha Shiehruphi, Dalmia Cement Bharat Limited ha Thangskai, bad ka Star Cement ha Lumshnong ha East Jaintia Hills.
Ha kane ka jingleit jngoh ha ka Star Cement, Lumshnong, u bah Wailadmiki Shylla u ban jur ba ka jingseng ia ki karkhana na bynta ka ioh ka kot kam dei ban pynjot pat ia ka mariang.
Ha kajuh ka por, ula bthah ia ki tnad ba dei peit ban ai ia ki thup kyrteng jong baroh ki karkhana sain dewiong kiba treikam katkum ka ain bad lada don kiba treikam beain ha Jaintia Hill. Ula pan ruh ia ki mar rew kiba la pyndonkam ki karkhana. U la pan ruh ia ki thup kyrteng jong ki par maw kiba don ha East bad West Jaintia Hills kynthup ki par mawshun.
Kane ka jingleit jurip ka long ban tip ia ka jinglong ka lyer bad ka sawdong sawkun ka mariang na ka jingdon ki karkhana.
Ha kajuh ka por, u la pynsngew ruh ia ka jingdonkam ban don ka jingshngain ia ki nongtrei khamtam ha kaba iadei bad ka jingkoit jingkhiah bad ban ai kam ai jam kham bun ia ki trai muluk.
Katba u bah Mayralborn Syiem ula ong ba ka dei ka kamram ka Committee ban peitngor ia ka jingshah pynjot ka mariang haba seng ia ki karkhana ban kyntiew ia ka ioh ka kot.
Ula pan ruh ia ka kaiphod jong ka kaiphod na ka Meghalaya State Pollution Control Board halor ka jingkhuid ka lyer ha katei ka thain kaba don ki karkhana.
Ha kajuh ka por, u bah Sosthenes Sohtun ula pynpaw ia ka jingsngew kmen ia ki kompeni kiba la wan seng karkhana ban ai kam ia ki samla hynrei ha kajuh ka por, ka donkam ban phikir ban sumar de ia ka mariang bad kyntu ia ki kompeni ban pyntreikam pura ia ka Corporate Social Responsibility (CSR).
Ula kyntu ia ki tnad ba dei peit ban tehlakam ia ka jingkhlong maw pathar, da kaba wanrah ia ki kyndon halor kane bad ula kyntu ia ki kompeni ba kin pyntreikam da ka juk stad mynta ban peitngor ia ka jinglong jingman ki karkhana.
Katba ka kong Santa Mary Shylla ka la pynpaw ia ka jingsngew khia halor ka mariang bad ka la kyntu ban don ka jingpynjyrngam biang ia ki jaka ba la kylla lyndum.