Shillong: Katkum ka jingong u Myntri ka tnat Food & Civil Supplies ka Jylla, u Bah Comingone Ymbon ka dor ki marbam ka la iapher jin haduh 13 tyngka hapdeng ka rilum Garo bad ka rilum Khasi na ka jingdon ka rel kaba kit mar.
Ha kajuh ka por, u la kyntait ba ka don ka jingkiewdor palat pud ki marbam hapoh ka Jylla lada ianujor ia ka dor ka mur bad kiwei ki jylla.
U la kam ba ka jingbym don ka lynti Rel ka la pynkiew dor ia ki mar ki mata namar ha Meghalaya baroh ki mar la shaniah beit na shabar lyngba ka surok. U la kam ba ka dor u khaw ka duna ha Garo Hills ka iapher haduh 13 tyngka shi kilo bad ka dor ha Shillong, namar ha North Garo Hills ka don ka lynti Rel ha Mendipathar.
U la ong ruh ba ka daw jong ka jingiapher ka dor bad kiew ha Meghalaya kadei namar bym beit shuh ka lynti ban pynpoi marbam sha ka Shillong hadien ba la khang iaki kali heh ban iaid lyngba na jingkieng dam Umïam.
Halor kane ka jingiakhih jong ka VPP u Myntri u la ong ba ka dei tang ban ioh jingmyntoi ka Party, daka ba ialam bakla ia ki paidbah, kiba lui lui. U Myntri u la iathuh ba ka tnat ka ju leit jurip ban pynthikna ba ki dukan die marbam kin buh ia ki dor hakhmat dukan, bad la leh ia kane lyngba ka Price Monitoring System jong ki Deputy Commissioner (DC) ban tehlakam iaka jingiadie palat dor.
Kham tad u khaw ha rilum Garo ba don ka rel ban ha Shillong, ong u myntri
