Shillong: U myntri rangbah ka jylla, u Conrad K Sangma ula ong ba ki jaka bym pat dep ker sainar shiah, katto katne kilomter, yn wad ia ki lad ban pynbeit ia kane ban pyndep ia ka jingker sainar shiah ha ki jaka bym pat dep.
Haba kren mynta ka sngi, u Conrad u la ong ba ula iakren bad ki ophisar ki BSF bad kila shim khia ban pahara bha ia ki jaka bym pat ker. Ula ong ba watla um kynmaw ia ka jingheh ki jaka bym pat ker sainar shiah, hynrei la ban jur ia ki BSF bad ki pulit, ba kin pahara kaba don ki mawthum ha kaba kam pat don ka jingker sainar shiah.
U la ong ba ka sorkar kan iakren bad ki paidbah nongshong shnong ha kito ki jaka ki bym pat dep ker sainar shiah khnang ban pyndep ia ka jingker sainar shiah na bynta ka jingbit jingbiang ki paidbah kiba sah ha khappud.
Lah ban kdew ba nalor kiwei ki shnong, ka shnong Lyngkhong kaba don ha Pynursla konstitwensi ka East Khasi Hills ka dei kawei ka bym pat lah ban ker sainar shiah namar ba ka don hapoh ka jingjngai na ka 150 yard na u mawpud ka India bad ka Bangladesh. Ki nongshong shnong kane ka shnong kila kyntu ia ka sorkar ba kan ker noh ia u sainar shiah najan u zero line khnang ba kin ioh ia ka jingshngain na ki kam tuh kam thiem ki briew na Bangladesh.
Ha ki jaka bym pat ker sainar, yn iapynbeit bad ki nongshong shnong, ong u Conrad
