Shillong: Ka Managing Committee jong ka skul Soso Tham Memorial Secondary School, Lawsohtun ryngkat ka Khasi Students’ Union ha ka 1 tarik Nailur 2024, ki la buh mawnongrim ban pynkiew sa shi mala ia ka skul Soso Tham Memorial Secondary School lyngba ka CSR project kaba la ioh na ka DIAGEO.
Ia kane ka skul la plie ha u 18 tarik u Nohprah, 2020 ha Lawsohtun Block – VI bad ka don ia ka klas 8-10.
Ia kane ka skul la seng kyrpang ka Khasi Students’ Union Laban Circle na bynta ki khynnah shynrang bad kynthei kiba wan na ki longiing ba duna bad ki ba lah ieh noh ia ki jingpule ki jong ki shiteng por na ki daw bapher bapher. Kane ka skul ka ai jingpule ei ia ki khynnah khlem shim pisa. Ka skul ka don haduh 40 ngut ki khynnah ia mynta.
Ka Managing Committee bad ka KSU ka don jingthmu ban pynmih sa shi mala ia kane ka skul khnang ban ioh kyntiew ia ka sha ka Higher Secondary School, ban ai jingpule na bynta ka klas 11 bad 12.
Ha kane ka sngi la don ryngkat ka ka Sumitra Panthi, Cluster Head, ka North East, Diageo, u Surajit Dutta, Public Policy Lead, ka Diageo, ki nongkitkam ka Managing Committee jong ka skul ba la lam khmat da Bah Daniel Khyriem Chairman ka MC, Bah Airpeace Rani, Secretary MC bad kiwei.
Yn kiew kyrdan sha ka Higher Secondary Ka skul Soso Tham, ka skul kaba khlem shim bai skul
