Shillong: U MLA ka Songsak u Dr. Mukul Sangma ula ther ia kane ka sorkar MDA-2, da kaba kynnoh ba ka la shu klun lut ia baroh ki kam ki jam da ki briew kiba don ha ka bor bad ka la khang lad ia ki samla kiba thrang ban trei ia ki kam kontrak.
U Dr. Mukul lem bad kiwei ki MLA, ula shim bynta halor ka mat kaba iadei bad ka jingsyllang ka jingkyrduh kam ki samla ha ka jylla, kaba la wanrah u MLA ka Amlarem u bah Lahkmen Rymbui hapoh ka iing dorbar mynta ka sngi.
U Dr. Mukul u la ong ba naduh 2018 ba wan synshar ka MDA kaba ialam ka NPP, ki samla kiba thrang ban pyrshang ban trei ia ki kam kontrak kiba rit, kim ioh jingtrei shuh ha ki tnad sorkar, namar ba la khang lad kane ka sorkar. U la ong ba ka kam kontrak ha ki tnad sorkar ka dei shi bynta ka jingai kam ai jam ia ki samla kiba don ka sap ban trei.
U la ai nuksa ba ha ka tnad PWD ia ki kam barit la pyllang lymbung baroh ha kawei ka thup khnang ban pynioh lad tang ia kiba heh spah bad ban khang lad ia ki kontraktor kiba rit bad ia ki samla kiba kwah ban trei ha kane ka kam.
Haba kynthah ia ka sorkar jylla, u Dr. Mukul u la ong ba la pyntip ia u ba katba ki samla kane ka jylla ki dang iakyrthat ban wad kam, hynrei ha Secretariat pat, la shlei pynban ki briew kiba nabar, kiba la thung kam kane ka sorkar kum ki consultants ha ki tnad bapher bapher.
Ula ther ruh ia ka jingpyniaid ka sorkar ha ki jingthung kam, kaba la buh ia ka jingartatien kaba jur ia ki samla.