Babu Kular Khongjirem.
Ki Khasi hyndai ki dei kiba smat kiba sting bha ban khie dang step.Ym tang ba ki khie dangstep,hynrei ki trei ki ktah khlem da thiah thai satia mar ia khie dang step.Na kata ka daw,ki shait ki khlain bad khiah krat khiah stang bad im tymmen ruh shibun.Na ka jingbatai jong ‘Ka Jingsneng tymmen’ la ai jingmut ba ‘Dei ban khie dangstep phyrngap naduh ba dang kynihbu syiar nyngkong’. Hadien ba la khie pat,ym dei ban shu shong thiah thai hynrei ban khih ban ksar,ban treikam trei jam khnang ban khlain bad khiah krat ka met ka phad.
Ha ka liang ka bam ka dih pat,ki Khasi hyndai ki ju bam beit da ki jingbam jong ka mariang kum ka Shriew,u phan karo,u phandieng,u sohphan, u shyieng sohphan,ka kait,ka sohtrun nalor bun ki soh ki pai ba ki shu thung hi ha ka mei mariang khlem da ai ne pyndonkam dawai( no chemicals) ei ei ruh em.Dei na kane ka daw, ba ki koit ki khiah krat bha bad ki im tymmen bha ruh haduh 90 ne 100 snem tam ei ei ruh.
Ngi iohi pat mynta ba, bun ki Doctor bad ki riew stad ka rep ka riang, ki riew stad ka bam ka dih (dieticians) shu ia bud ia ka jinghikai ki longshwa manshwa jongngi.Lada don ba leit iasyllok(consult) ia ki Doctor mynta namar ba sngaid than ka met, ne ba pang kpoh, ne ba ioh pangmat, ne ba ktha ka met ka phad, ki Doctor kin phah khie step bad phah leh ki kam khilan met(physical exercises).Kin batai ruh ba phin kham koit kham khiah krat bha, dei ban mareh step ruh.Ki ong ruh ba lada phi lah ban mareh step man ka step bad khilan met de, phin sa koit na ki laiphew jait ki jingpang nalor ba kin long kiba koit ba khiah, ba shait ba khlain bad im slem ka rta ruh.
Ym tang katta, kiba bun na ki riew stad jong ki jait jingbam (dieticians) ki lap ba ki jingbam kiba mih beit na ka mariang khlem pyndonkam dawai kilong kiba kham bha ia ka met ka phad u briew bad ka koit ka khiah jongu ban ia ki jingbam kiba la khleh bad pyndonkam dawai(chemicals). Ki ong ruh ba lada bam da ki jingbam jong ka mariang (natural foods) kumba bam ki riew hyndai,ka met ka phad ka koit ka khlain bha wat la kim tei ne san kloi ka met ka phad hynrei ka rta ne ka jingim ruh ka kham slem. Hynrei kito pat kiba bam da ki jingbam ba khleh lang bad ki dawai(chemicals), ki jait jingbam ki kham bang,ki kham shngiam bad ki pynheh- pynsan kloi ruh ia ka met ka phad kumba long ki briew jong kane ka juk mynta. Hynrei kum kine ki jait jingbam pat kiba pynsan bad pynheh kloi kum ki ‘yiar pham(kroilers/broilers), ki wanrah pynban bun jait ki jait jingpang tang hadien khyndiat snem nalor ki pynlyngkot kloi ia ka rta bad ka jingim briew. Ha ia pyrkhat bha, kine ki riew stad kane ka juk mynta kim dei ba ki shu bud na ka jinghikai ki longshwa man shwa jongngi?Kine kiei kiei ki long shisha ki jingphylla bad jing maian jong ka sap u Khasi hyndai.
Ka Saians bad ka Maian u Khasi halor ka jingkhie step bad ka Bam ka Dih
