Shillong: Ki nongialam seng Samla Hima Langrin ki la kynnoh ba u Acting Syiem ka Hima Langrin u Paiem Brilliant Henry Syiemiong ula leit ban pyndem tdong ialade hakhmat ka Mangement Board bad u lilam noh ia ka bor jong ka Hima.
Haba kren sha ki lad pathai khubor mynta ka 20 tarik Nailar 2024, u nongialam ka Seng Samla Hima Langrin u bah PS Lyngdoh ula ong ba ka Hima dang shen ka dang shu ioh ia u Acting syiem ba thymmai da ka jingkyrmen ba un weng ia ka jingdon ar tylli ki bor hapoh ka Hima Langrin, hynrei phewse kine ki kylla khongpong namar ba une u Acting Syiem um shym la ieng ia ka hok longtrai ki khun hajar hynrei ula leit ban pyndem tdong ialade hakhmat ka Management Board bad la kynnoh, ba u lilam noh ia ka bor jong ka Hima tang na bynta ka pisa kaba T.4.30 lak tam , la kynnoh u bah PS Lyngdoh.
Katkum ka jingong u bah Lyngdoh, ha jingwad jingtip bniah la lap ba ka don shisha ka pisa jong ka Hima Langrin kaba kot T.4 klur 30 lak tam kum ka bai shim jaka ki BSF na ka Hima na bynta ban ker sainar.
Ula ong ba kane ka pisa baroh kadei jong ka Hima hynrei u Acting Syiem ula leit pyndem ialade da kaba kam ba kin sei noh tang ia ka bhah ka Hima kaba long T.2.15 klur.
Halor kane u bah PS Lyngdoh ula pynrem jur ia une u Acting Syiem bad u la pynshai ba kum ki nongialam seng Samla kim don bynta eiei wat tang shipiah shi naia ruh.
U la kyntu ia ka District Council ba kan shim ia ka sienjam na bynta ban wanrah ka lad ka lynti na bynta ban pynbeit ia kane.
Ula ong ba kum ki nongialam ka seng Hima ki la pynpaw ia ka jingsngew bitar bad ula kyntu ia ki paidbah ba kim dei ban pdiang kulmar ia ki jingiarap ban wan tyrwa namar ba kane ka pisa ym tip ka wan naei bad ka mih naei.
Shah kynnoh u Acting Syiem ba lilam ia ka bor ha ka T.4.30 lak
