Shillong: Ka jingbha ka surok bad ka jingitynnad ka mariang, ka la khring ia ki nongniah ar shaka, ki nongniah kali ban iaid kai suwari bad kawei na ki jaka kaba kham khring ka dei ka thain Sohra, kaba pawnam bha ha ki kam jngohkai.
Ka jingleit iaid pawang jongki, ka kham jur bha ha ki sngi shuti kum ha ka sngi Saitjain, sngi u Blei bad ha kiwei ki sngi shuti, kum ha ka sngi laitluid ka ri bad kiwei. La iohi ba da ki spah tylli ki ar shaka, kiba ialang kynhun kila leit iaid pawang bad pynher sha katei ka thain. Kine ki ar shaka kim dei tang na kane ka jylla, hynrei ki briew kiba nabar jylla ruh ki wan ban leit bam lyer pynngad sha kane ka jylla rilum.
Kane ka jingpynher sted jongki, ka la buh pat ka jingma ia kiwei kiba leit kiba wan, ki kali ruh kumjuh namar ba ka lah ban buh jingma tang shu bakla wiak. Ki don ki riew paidbah ba kan bha ba ka sorkar kan buh da ki pulit kumba long sha kiwei ki jaka, khnang ban peit khmat bad leh kam ia kiba pynher sted palat khnang ban lait na ka jingma kiwei pat.
Ha ka jingshisha, la ju ruh ka jingkyrpad na ki paidbah ban don ki pulit ha ki katto katne ki jaka, khnang ban pynshynrain ia ki nongniah ar shaka na kaba pynher sted bad leh khyllew (stunt). Kumba ju iohi, ka jingdon ki pulit tang ha Lailad ha Hynniewmer ban leit sha Pynursla, Sohra bad sha thain Nongstoin, Mawkyrwat kam shym la pyntieng ia ki nongniah namar ba tang shu lait na katei ka jaka, kin ioh ban pawang laitluid. Jin lada don ki pulit ha Umtyngar, ha Jingkieng Mawkdok, kan iarap shibun ban pyllong don akor ia ki nongniah ar shaka.
Iaid pawang ki ar shaka sha surok thain Sohra ha ki sngi shuti
