Shillong: U Myntri ba khmih ia ka kam ialehkai ka Jylla, u Bah Shakliar Warjri u la ong, ban sei madan bad kyrshan ia ka sap ba ki khynnah ki don la ka long ha ka kam ïalehkai phutbol ne kiwei pat ki jait jingïalehkai, ha ka pyrthei ‘Social Media’ mynta ka long kaba donkam bha.
U Myntri u la ai ka jingkhublei kitbok kitrwiang ia u heprit Samborlang Rynjah, 7 snem ka rta mynta ka janmiet ka 13 tarik u Nailar, 2024, shwa ba un mih na Shillong ban leit shah pyntbit ha ka Minerva Football Academy haduh 10 snem ha Punjab.
Kum ban shu kdew ba u heprit Samborlang u la pawnam ha ki bnai kiba la dep na ka video kaba pyni ia ka jingtbit ap kol jong u bad la pyniasyriem ia u kum u Emiliano Martinez, u rangapkol ka Ri Argentina kaba la rah ia nam lahduh jong ka lympung ïalehkai phutbol World Cup 2022.
Kane ka video ka la khring ia ki Club na shabar Jylla bad bar ri kumjuh bad mynta ka kynti u heprit Samborlang Rynjah u la ioh ban soi ia ka kontrak ba 10 snem bad Minerva Football Academy ha kaba un ioh ia ka jingpyntbit nadong shadong.
10 snem yn leit pyntbit u heprit Martinez Samborlang Ranjah, ai khublei kitbok u Myntri
