Shillong:Ka myntri ka tnad ka koit ka khiah ka jylla ka Kong Ampareen Lyngdoh mynta ka sngi ka la leit jngoh ia ki nongtrei ka Samagra Shiksha Abhiyan (SSA) kiba la pyllong ia ka jingiakhih ha madan Malki, ban dawa pynkiew ia ka tulop jongki.
Ka jingiakhih jongki nongtrei SSA hapoh ka lama ka All Meghalaya SSA Non-Teaching Staffs Association (AMSNSA) ka la iaid sha ka shi taiew tam eiei.
Ka kong Ampareen ka la ong ba kam tip ba ki dang don ha ka jingiakhih namar ba ka la mut ba kila iapynbeit hynrei ka jinglap jongka mynta ka sngi, ka la pynlyngngoh ba ki dang don ha ka jingiakhih bad ka la iakynduh bad ki, ba kan iakren bad ka sorkar halor ka jingdawa jongki.
Ka la ong ba kam lah ban kren khlem da ioh jingtip kaba thikna halor bad kan wad jingtip shwa bad kan sa wan biang ha ka sngi Nyngkong.
Ka jingiakhih jongki, ka long ban dawa na ka sorkar ban pynkiew ia ka tulop sha ka 80 percent na kaba mynta, nalor ka 2 percent katkum ka jingslem ha ka kam bad 5 percent ban pynkiew ia ka tulop ne ka increment.
Ki don baroh 12 spah ngut eiei ki nongtrei ha ka SSA haduh mynta. Ka la ong ba ka sorkar ka la kular ban pynkiew tang 25 percent hynrei kila dawa beit ba ka sorkar ka dei ban pynkiew sha ka 80 percent.
Kyndit ka kong Ampareen ba dang don ka jingiakhih ki nongtrei SSA ba iakhih
