Shillong, Nailar 10: Ka jingialang jong baroh ki 10 tylli ki District bad ki Autonomous Council jong ka thain shatei lammihngi ka ri India, kila rai ban thaw ia ka Committee ban buddien ia ki mat kiba la dep iakren bad u myntri ka tnad kam pohïing ka ri u Amit Shah dang shen halor ka jingpynkhreh ka sorkar India ban pynkylla ia ka Sixth Schedule jong ka jingpynkylla kaba 125 ka riti synshar ka ri.
Ha kane ka jingialang kaba long mynta ka sngi ka 10 tarik Nailar 2024 ha Shillong, la wan iashim bynta baroh ki nongmihkhmat na ki Autonomous District Council kynthup ka KHADC, JHADC, GHADC, Bodoland Territorial Council, Tripra Tribal Area Autonomous District Council, North Cachar Hills Autonomous Council, Karbi Anglong Autonomous Council, Chakma Autonomous District Council, Mara District Council bad ka Lai District Council.
Haba kren hadien ba la wai ka jingialang, u CEM ka KHADC u bah Pyniaid Sing Syiem u la iathuh ba la rai ban buddien biang na ka tnad kam pohiing ka ri halor kane shwa ka 25 tarik mynta u bnai kumba la buh por u Amit Shah.
U la ong ba la thaw ruh ia ka Committee ha kaba la thung ia u kum u Chief Convener nalor ki Adviser ba kynthup ia u nongialam ka Tripra Motha Party u Pradyot Deb Barman, u CEM ka Bododland Territorial Council u Pramod Bora nalor ki Convener.
U bah Pyniaid ula pyntip ba u CEM ka Bododland Territorial Council u Pramod Bora bad u nongialam ka Tripra Motha Party u Pradyot Deb Barman kila kular ban ai jaka ia ki Autonomous District Council ban shna ia ki guest house jongki ha ki jaka jongki.
Ka jingialang ka la rai ruh ban pyllong ia ka prokram pyni lariti hapdeng ki 10 tylli ki autonomous district council da kaba iakylliang jaka na kawei ka snem sha kawei pat.
Rai ki 10 ADC ban buddien tyngeh ban pynsted ia ka jingpynkylla ia ka 6th Schedule
