Shillong: U myntri ka tnad pule puthi ka jylla u Rakkam A Sangma ula jurip ia ka jingpyntreikam ia ka Shillong Engineering College ha Mawlai ha kane ka taiew.
Haba kren sha ki lad pathai khubor, u myntri ula iathuh ba ka jingpyntrei ka la dep ia ka jingtei bad sah sa tang ban sdang ia ka jinghikai. Hynrei, u la ong ba kaba sah ka long ba donkam ban shna ia ka Administrative Building la kajong katkum ka jingbthah ka All India Council for Technical Education (AICTE).
U la ong ba ka jingsdang ia ka jinghikai kan sdang shen la kumno kumno ha samoi ban wan yn sdang ia ki katto katne ki jait jingpule. Ha kane ka Engineering College yn hikai ia ki jait jingpule kum ka Civil, Mining, Mechanical, Electrical bad ka Computer Science. U la ong ba ka sorkar ka la pynkhreh shaid shaid ban pyndep ia ki jnit ki jnat katkum ka jingbthah ka AICTE.
Ha kajuh ka por, u la iathuh ba ka sorkar ka la leh shibun ki kam ban pynbha ia ka pule puthi naduh ka jingshna ia ki skul, ki college kiba la jot bad nalor kiwei ki jingdonkam ha kylleng ka jylla.
U la iathuh ba la dep pynshna bha ia kumba 200 tylli ki skul kiba la dep shna pynbha bad sa kumba 700 tylli yn pyndep ha kine ki ar snem eiei ia baroh ki skul sorkar. Ki don kumba 2000 tylli ki LP skul ka sorkar ha ka jylla. Katkum ka jingiathuh u myntri, ka jingpynbha, la phiah ha ki bynta katkum ka jinglong jingman jong ki skul, kaba kynthup ban shna pura, kiba shu donkam maramot bad kiba shu donkam ban pynbha malu mala.