Shillong: Mynta ka step 8 tarik Nailar 2024, ka Khasi Students Union (KSU) ka la mih kynsan bad leit tur puk ha phyllaw ka Meghalaya Public Service Commission (MPSC) ban dawa hiar shuki syndon ia u Chairman bad Secretary.
Kane ka jingiakhih ka KSU ka dei ha ka sien kaba ar ban dawa na ka MPSC ban pynbeit ia ki kynrum kynram ha ka jingpyniaid iaka eksamin kam bad Civil Services.
Ka KSU ka la dawa ba dei ban pyllait paidbah ia ki mark kiba la ioh ki candidate kiba ialeh ia ka Civil Services namar ba ka la don ka jingsuba ba ka don ka jingleh bym dei, hynrei halor kane ka jingdawa ka KSU, ki don kiba la ialeh ia ka Civil Servies ki la pyrshah namar ba ki sngew ba ka long ka jingthad.
Hadien ba ka MPSC kam shym la pdiang ia ka jingdawa ka seng, ka KSU ka la mih syndon shakhmat ban dawa kaba kham tyngeh.
Ha kane ka jingiakhih mynta ka sngi, ki dkhot ka seng ba la don lang u President samla Lambokstarwell Marngar kila rah da ki plakad jingthoh pynrem ia ka MPSC bad kumjuh kila pyrta shla ba dei ban hiar shuki noh u Chairman bad u secretary kane ka Commission kaba la kup da ka dur ka dar kaba jngut hakhmat u paidbah bad ka la dawa ban pynthymmai ia kane ka tnad pyniaid eksamin ba heh tam ka jylla, ban lait na ka jingdonkti ki riew sain pyrthei.
Puk tur ka KSU ha phyllaw ka MPSC, mih ka sur dawa hiar shuki ia u chairman bad secretary
