Shillong: Ka Noth East Students Organisation (NESO) ka la pynher shithi sha u Myntri Rangbahduh ka ri u Narendra Modi bad kumjuh u Myntri ka tnad kam pohïing u Amit Shah ba kin tuklar mardor ban ym ailad wat tang uwei ruh ban wan rung sha ki jylla ha North East na Bangladesh.
Ha kajuh ka por, ka NESO ka la dawa ba ka sorkar India kam dei ban ai jaka sah iano iano kiba na Bangladesh ha ka North East, hynrei ka dei ban pahara bad phikir bha ia baroh ki khappud ha ka thain khnang ban tehlakam ia ka jingthmu wan rung tuh ki briew na shiliang pud ka Bangladesh.
Kane ka jingpynher shithi ka NESO ka long hadien ba ka ri Bangladesh ka la don mynta hapdeng ka jingkynad haduh ba ka Prime Minister ka Sheihk Hasina ka la hap ban risain bad phet krad noh na la ka ri.
Ha ka kyrwoh u bah Samuel Jyrwa u chairman bad u Mutsikhoyo Yhobu u Secretary General, NESO, ki la ong ba ka la don ka jingsyier ia ki riewlum ha kane ka thain shatei lammihngi ba ki briew na Bangladesh ki lah ban wan phet bad rung sha India, kaban long ka jingma shibun.
Ka North East Students’ Organisation (NESO) ka kynthup ia ki seng jong ki samla pule na Assam, Meghalaya, Manipur, Mizoram, Nagaland, Arunachal Pradesh bad ka jylla
Tripura.
Ka NESO ka la ong ba ka North East ka don saw tylli ki jylla kiba khappud bad ka ri Bangladesh ba kynthup ia ka Tripura kaba don 856 kilometer ka jaka khappud bad ka Bangladesh,
Meghalaya 443 km, Mizoram 318 km bad ka jylla Assam kaba don 262 km ka khappud bad ka Bangladesh.
Ka NESO ka la ong ruh ba ha u snem 1947, da ki lak ngut ki Bengali na ka East Pakistan (Ka Bangladesh mynta) kila wan rung beain bad sah syndon ha Assam bad ha Tripura bad kumjuh ha ka thma laitluid ka Bangladesh ha 1971, da ki lak ki la wan rung bad sah duh ha ka thain North East, kaba la ktah jur ia ka trai shnong riewlum ha Assam, Tripura bad Meghalaya.
Kane ka jingwan rung bad sah ki briew kiba wan na Bangladesh, ka la ktah ia ka jingbun briew, ka riti dustur, ka kamai kajih, ka trei ka ktah bad ka la wanrah ka jingiasum snam ruh bad kila knieh ruh ia ki jaka ki puta jong ki riewlum.
Ha jylla Tripura, ki trai shnong kila kylla rit paid ha ki nongwei bad mynta ki don tang 30 percent bad kumjuh ha Assam ka la don ka jingiakhih haduh hynriew snem kaba la pyllong ia ka sorkar India ban iasoi ia ka Assam Accord kaba la kular ban pynphai biang ia ki briew sha Bangladesh. Kiwei ki jylla kynthup ka Meghalaya bad Arunachal Pradesh kila mad ia kane ka jingma na ka jingwan buhai shnong ki briew nabar.
Na ka jingkynad ha Bangladesh, syier ki trai shnong riewlum, pynher shithi ka NESO sha u PM, HM
