Shillong: Ka sorkar India ka la pynhiar da ki shipai ki swar sha khappud hadien ka jingkynad kaba jur bha ha ka ri Bangladesh kaba la pyllong ia ka Prime Minister katei ka ri, ka Sheihk Hasina ban risain bad phret krad syndon sha India mynta ka sngi.
Ban tem ia kano kano ka jingjia kaba lah ban klang ding sha ka ri India, ka sorkar India ka la phah ia ki shipai bad mynta ka sngi da ki phew kali ki shipai kila wan shna ktem ha Nongtalang, West Jaintia Hills kaba don marjan ka khappud ka India bad ka Bangladesh.
Kane ka jingwan poi ki shipai India ha ka thain khapppud ka la long ban iada ia ki briew jong kane ka ri na kano kano ka jingshah hiar thma na shiliang pud.
Mynta ka sngi, u symbud myntri rangbah ka jylla u bah Prestone Tynsong ula pyntip ba ki don 9 Battalion ki BSF kiba la wan kyrpang ban pahara ha khappud ka Meghalaya hadien ba la mih ka jingjia ha Bangladesh.
Ha kajuh ka por, ka sorkar Meghalaya ka la pynjari korphiw ha baroh shi lynter ka khappud bad ka Bangladesh naduh 6pm haduh 6am hapoh 200 metre shapoh India na u rishot mawpud ne u zero line ka India bad ka Bangladesh.
Ha kawei ka liang, la ioh jingtip ba mynta ka miet, da ki hajar ki briew na Bangladesh kila wan da ki lieng ryngkat ki torch light ban khlong maw ha wah Umngot hajan Dawki. Kane ka jingthaba ki ding khrik rik rik, ka la pynkyndit ia ki briew kiba sah ha India na ka thain Dawki, Umsyiem bad kiwei ki shnong.
Katkum ka jingtip katei ka jaka kaba wan kiew ki briew na Bangladesh ban khlong maw, ka dei kaba la khang pyrshah ha ka por ba synshar ka Sheihk Hasina hynrei mynta ka miet hadien ba ka la khyllem, kila wan kiew kum ki kber da ki lieng ban khlong maw ryngkat ka tbeh ding.
Sdang tur ki Bangladeshi ha khappud Meghalaya, pynap ka India da ki Shipai
