Shillong: U Symbud Myntri Rangbah ka jylla u bah Prestone Tynsong u la ong ba ka jingiakren bad ka Harijan Panchayat Committee jong ki briew kiba sah ha Them Iewmawlong kan long shen.
U bah Prestone uba dei ruh u Chairman ka High Level Committee (HPC) ban pynbeit ia ka jingpynkynriah iaki briew kiba sah ha Them Iewmawlong, u la ong ba watla ym kynmaw bha ia ka Tarik, hynrei ka tnad Urban Affairs ka la don ka jingtip ia ka jingialang bad ki nongmihkhmat ka Harijan Panchayat Committee.
“Ka jingiakren kan long biang shen, tangba ia ka Tarik, ngam kynmaw, sngewbha wad jingtip na ka tnad Urban Affairs”, la ong u bah Prestone.
Lah ban kdew ba kumba 342 tylli ki longïing kiba sah ha Them Iewmawlong, kin ioh ia ka iing ban shna ka sorkar sha Bishop Cotton Raod, hadien ba la pynkynriah na Them Iewmawlong.
Kane ka jingpynkhreh ka sorkar ban rah noh ia ki briew kiba sah ha Them Iewmawlong ka la iakynduh mawsiang hadien ba kine ki briew kim treh hynrei hadien ka jingiakren lyngba ka jingbthah na ka Kashari High Court, ki ar liang mamla, kila mynjur ban iaid shakhmat.
Ka jingdawa ban pynkynriah ia ki briew na katei ka jaka, ka la khie ha u snem 2018 hadien ba ka la mih ka jingiakhih kaba shyrkhei ha ka nongbah Shillong.
Shen yn kynduh biang ka sorkar bad ka Harijan Panchayat Committee halor ka Them Iewmawlong
