Shillong: U MLA ka Nongkrem uba dei u President ka seng Voice of the People Party (VPP), u bah Ardent Miller Basaiawmoit ula sangah ia kito kiba batai stad ba ka Sixth Schedule kaba la pynkup bor ka Article 244 (2) ka kham khlain ban ia ka Article 371.
Haba kren ha ka jingialang pyllait ia ka MLA skhim jongu ha Lad Nongkrem ha ka 23 tarik Naitung 2024, u bah Ardent u la ther ia kito kiba pyrshah ia ka jingdawa ka VPP ia ka article 371 khnang pynkulmar ia ki paidbah.
Ula buh jingkylli, ba lada ka Sixth Schedule ka dei shisha kaba khlain ban iada ia ka jaitbynriew, balei kam lah ban khang ia ka jingtih maw tih shyiap, ka jingtih dewiong bad ka jingkhang pom dieng.
“Don kiba batai ban pynkulmar jingmut ia ki paidbah ba u bah Ardent ne ka VPP ba ki dawa ia ka artikil 371. Lada ka ADC ka dei shisha kaba khlain ban iada nga ia ngi balei kam lah ban khang ban tih shyiap, tih dewiong, pom dieng, shano kata ka bor jong u paidbah. Don ki riew saidain kiba batai ba ka Sixth Schedule ka kham khlain ia ka Article 371, ngam tip katno tylli ki mukotduma kila jop ba kin batai maki ia ka Sixth Schedule bad ka Article 371”, la ong u bah Ardent.
Ym tang katta ula ther ia ki riew said kiba la batai ba ka Sixth Schedule ka kham khlain ia ka article, bad ula buh jingkylli, hato katno tylli ki mukotduma ba kita ki riew said ain kila jop ba kin batai maki ia ka Sixth Schedule bad ka article 371.
Ha kajuh ka por, u la ong ba shwa ba un khaprip ki khmat na kane ka pyrthei, u kwah ban iohi ba ka jaitbynriew kan long kaba iatylli, kaba riew spah, namar ba watla u Blei ula kyrkhu ia ka jaitbynriew hynrei ki paidbah ki duk lait noh tang kiba don jingiadei bad kita kiba don ha ka bor.
U la pynpaw ia ka jingkyrmen ba ym don jingartatien ba ha u snem 2028, ka VPP kan synshar marwei ia kane ka jylla bad u la ong ba ha ka MP elekshon kaba la dep, kiwei kila kren kop kren bein ia ka VPP hynrei ka la jop 3lak 71 hajar vote bad na ki 36 tylli ki konstitwensi, ka la jop 32 tylli ki konstitwensi.
“Shwa ba ngan khaprip ki khmat na kane ka pyrthei, nga kwah ban iohi ba ka jaitbynriew kan long kaba iatylli, ka ri kaba riew spah, namar ba watla u Blei ula kyrkhu ia ngi hynrei ki paidbah ki duk lait noh tang kiba don jingiadei bad kita kiba don ha ka bor”, la ong u bah Ardent.
Haba pynpaw ba ka VPP kan synshar ha ka elekshon MDC bad MLA kaban sa wan, u la ong ba ym don jingartatien ba ha u snem 2028, ka VPP kan synshar marwei ia kane ka jylla.
“Ha ka MP elekshon ba la dep, kila kren kop kren bein hynrei ngi la jop 3.71 lak vote bad na ki 36 tylli ki konstitwensi, ngi la jop 32 tylli ki konstitwensi”, u la bynrap.
Don kiba batai stad ba ka Sixth Schedule ka kham khlain ban ia ka Article 371: Ardent
