Shillong: Ka lympung lehkai ka Meghalaya Youth League 2024 ka la sdang ha kane ka sngi Saitjain ha kylleng ki jaka ha jylla.
Ka Zone B kaba hap ka Jaintia Hills, ha ka U-14, ka Saipung Block Sports Association ka la jop da 2-1 kol pyrshah ia ka East Jaintia District Football Association hynrei ha ka U-16 division ka East Jaintia ka la jop da 2-1 kol pyrshah ia ka Saipung.
Ha kajuh ka sngi, ka Amlarem Block Sports Association ka la jop ha baroh ar tyllli ki jingiakhun ha ka U-14 bad ha ka U-16 pyrshah ia ka Laskein Block Sports Association da 4-1 kol bad 1-0 kol
U Emon Mylliem ula ioh thep hat-trick ia ka Amlaren ha ka jingiakhun jong ka U-14.
Katba ha ka Zone A, ka hap ka Garo Hills. Ha ka U-14 ka Tura District Football Association ka la pynliem da 13-0 pyrshah ia ka Baghmara District Football Association.
Ka Shillong kaba hap hapoh ka Zone C, ka jinglehkai ka long hapdeng ka Shillong Sports Association pyrshah ia ka Ri-Bhoi District Sports Association. Ha kane ka jingiakhun ka Ri Bhoi ka la jop ha baroh ar tylli ki jinglehkai ha ka U-14 ka la pynliem da 3-0 kol bad ha ka U-16 ka la jop da 3-2 kol.
Ka Zone D kadei kaba bun tam ki kynhun lehkai ha kaba ha ka sngi sdang la pynlehkai haduh lai tylli ki jinglehkai. Ka Nongstoin District Sports Association, Mawkyrwat District Sports Association bad Pyndengumiong District Sports Association ha ka thup jong ka U-14.
Ka Nongstoin ka la jop da 7-0 kol pyrshah ia ka Eastern Border Sports Association, ka Mawkyrwat ka la pynliem ia ka Tyrsad Area Sports Association da 3-0 kol bad ka Pyndengumiong ka la jop da 5-0 kol pyrshah ia ka Mawshynrut Sports Association.