Shillong: Ka Khasi Students Union (KSU) mynta ka sngi, kam shim ba ka jingiakren bad u Myntri Rangbah ka jylla u Conrad K Sangma ka long kaba seisoh hynrei ka shim ba ka dei ka jingkhmih lynti kaba tang 50 percent.
U Myntri Rangbah ka jylla u la khot iakren bad ka KSU mynta ka sngi hadien ba ka seng ka la pyllong ia ka jingkhynra ia ki nongbylla bar jylla kum shi bynta ban dawa ban pyntreikam noh ia ka ain shongwai ka Meghalaya Resident Safety and Security Act (MRSSA) 2016 bad kumjuh ia ka Eastern Bengal Frontier Regulation Act 1873 ne kaba khot kum ka Inner Line Permit (ILP).
Haba kren sha ki lad pathai khubor, u President ka KSU u bah Lambokstarwell Marngar u la ong ba ka Work Permit ka dei ka ktien lyngkot jong ka Inter State Migrant Workmen (Regulation of Employment and Conditions of Service) Act 1979. U President ka KSU u la ong ba ka seng ka la ai jingmut ban bsuh ia ki rules ka ain ka sorkar pdeng ban pynkhlain shuh shuh ia ka jingtehlakam ia ka jingwan pathar ki briew khamtam ki nongbylla nabar.
Ha kajuh ka por, u la ong ba ka seng kam ym sangeh hynrei kan bteng ban khynra ia ki nongbylla nangne shakhmat bad ka dei ban pyntreikam shwa ia ka MRSSA tynrai katba ka sorkar India ka dang bishar ia ka ILP.
Lah ban kdew ba ka KSU ka la kam ba kumba 2500 ngut eiei ki nongbylla bar jylla kila shah beh haduh kine ki sngi.
Ula maham ba katba ka sorkar ka dang eksamin, ka KSU kan sa leh da ki kam.
Ka jingkhmih lynti kaba 50 percent, ioh ka KSU na ka jingiakren bad u Conrad
