Shillong: Ka ïing ka khlawait ka Hima Nongkhlaw ka Phan Nonglait ka dang don haduh mynta ha ka shnong Nongrimai. Ka shnong Nongrimai ka jngai kumba katto katne kilometre na Mairang, kaba dei ka jaka treikam ka Eastern West Khasi Hills District.
La antad ba kane ka ïing kaba shna da ki dieng bad sop tin hyndai, ka la palat 200 snem eiei haduh mynta.
Ka Phan Nonglait ka dei ka samla kynthei kaba la iarap ia ki shipai u Tirot Sing ban pyniap ia ki shipai Bilat ha katei ka por da kaba pynbieij ia ki da ka bor kynthei jongka.
La iohi ba la shna ia ka iing da ki rishot dieng bad kynton maw malu mala, bad ki dieng kila bun kiba la pyut, kiba la bam kruin lut namar ba ym don ba ri ba sumar ia ka.
Ha phyllaw kane ka ïing, la iohi ba mynta ki briew kila thung phan thung jhur kiba la sei da ki rong jyrngam ban pynitynnad ia ka sawdong jongka ïing.