Shillong: Katkum ka riti dustur u Khasi ka jingai jait ka dei sha ka kmie bad kiba leh pyrshah ia kata, kim dei shuh ban ioh syrnod Schedule Tribe. Ka ïing dorbar ka KHADC mynta ka sngi, ka la iakren ia kane ka mat.
U Deputy Chief Executive Member ka KHADC u bah Pynshngain N Syiem ula ong ba ki Khasi ki bym bud shuh ia ka riti dustur u Khasi ban ai jait sha ka kmie, kata ka mut ba kim dei shuh ban ioh Schedule Tribe.
U bah Pynshngain ula ong ia kane haba jubab halor ka mat ba wanrah u bah Titosstarwell Chyne hapoh ka dorbar mynta ka sngi 11 tarik Naitung 2024.
U bah Pynshngain ula ong ka Khasi Social Custom of Lineage Act 1997 ka la pynlong ain ia ka dustur ba ki Khasi ki dei ban shim jait na ka kmie.
U la ong ba ki Deputy Commissioner ki dei ban bud ia ki kyndon ka ain ka district council katkum ka riti dustur haba ki ai ia ka Schedule Tribe kumba la pynmih jingpynbna ka ka sorkar jylla lyngba ka tnad Social Welfare.
U la ong ba lada bakla tiak ha ka jait ka kynja, kan mih ka shongkha shongsang para Khasi bad ula kyntu ia ki nongthaw ain, ki nongmihkhmat ba kim dei ban leh mata made halor ka jingai jait ai kynja, ioh thynrei ka jaitbynriew.
Kiba ai jait kpa kim dei shuh u khasi, ka dei ka dustur bad ka ain ruh: Pynshngain
