Shillong: Ka KSU lyngba ka tnad Employment Monitoring Cell ka la ioh ki jingujor na bun ngut ki samla Khasi kiba thep ia ki kam Gramin Dak Sevaks ha ka Department of Posts, ha kaba kim ju pass ia kane ka kam namar ka jingdonkam ban nang ïa ka ktien Hindi kaba long ka diengpynkiang ia ki. Kane ka mat ka la pynlong ia ka jingduh kam ia bun ngut ki Khasi wad kam wad jam ha kaba ia ki kam Gramin Dak Sevaks ha Ri Khasi la ioh beit da ki dkhar ba kren Hindi na kiwei pat ki jylla khamtam na ka Hindi belt.
Ka jingioh kam ki dkhar ba kren Hindi ha kine ki posts ha Ri Khasi ym tang ba ka pynduh kam ia ki samla Khasi ba wad kam hynrei ka buh jingeh ruh ia ki paid nongshong shnong khamtam kiba na nongkyndong namar ym ia pei ka ktien ka thylliej bad kine ki dkhar ki bym nang ban kren ia ka ktien Khasi. Shuh shuh ka buh ruh ia ka jingsngew salia ia ki paid nongshong shnong halor ka jingwan shong shnong kine ki briew na ri thor ha ki nongkyndong. Bun ngut ki nongialam shnong na kylleng ka Bri U Hynñiewtrep ki la buh ka jingujor ha khmat ki nongialam ka KSU halor kane ka jingeh.
Kumta ka KSU halor kane ka mat ka la leit khah khah ban ia kynduh ia ki bor pyniaid ka Department of Posts ha Shillong ban pynsngew ba lada ha Mizoram ki nongialem eksam kam ki hap ban nang kren ia ka ktien Mizo balei ha Meghalaya ruh ym pynurlong ba ki candidates ki hap nang kren Khasi ha ki kam ba lait ha Ri Khasi bad ktien Garo ha ki kam ba lait ha Garo Hills.
Ka Employment Monitoring Cell hapoh ka jingialam u Chairman & Secretary, kata u samla Reuben A Najiar bad u samla Manly Nongpluh ki la buh syndon da ka dorkhas ha khmat u Senior Superintendent of Posts, Shillong Post Office bad kumjuh ruh sha u myntri rangbah ka jylla, u Conrad K Sangma ban dawa tuklar bad kyndit thiah noh halor kane ka mat kaba eh bad kaba ktah ia ka ioh kam ioh jam bad ruh ka jingiaid beit iaid ryntih ki kam post office ha baroh kawei ka jylla.
Mynta ka sngi ka Ministry of Communications lyngba ka Department of Posts ka la pynkylla ia ki kyndon thep kam ha jylla Meghalaya ha kaba kito kiba thep ia ki kam Gramin Dak Sevaks ha Khasi-Jaintia Hills kin hap nang beit ia ka ktien Khasi bad kito kiba thep ia kitei ki posts ha Garo Hills kin hap nang beit ban kren Garo. Kane ka jingpynkylla kan ai jingmyntoi ia ki samla wad kam Khasi bad kumjuh ruh ia paidbah ka Ri Khasi kiba hap ia dei kam bad ki post offices.
Khatduh khatwai ka KSU ka ai khublei ia ka Department of Posts, Government of India ba ka la sngap ia ki jingujor ka seng lyngba ka sorkar jylla bad pynwandur na ka bynta ka myntoi ki paid trai shnong ka jylla. Kane ka long katkum ka kyrwoh na u samla Reuben A Najiar
Chairman, Employment Monitoring Cell Khasi Students’ Union.
Urlong ka jingshim khia ka KSU halor ka kam Gramin Dak Sevak
