Shillong: Saw ngut ki dakait nonglute na Assam kila shah kem ha ki pulit ryngkat ki ar shaka ba ki pyndonkam ban pynsuk ban leh ia ki kam sniew jongki ha ka leit ka wan.
Ha ka kyrwoh mynta ka sngi, u Pawar Swapnil Vasantrao, IPS u Superintendent of Police North Garo Hills, Meghalaya, u la ong ba ha ka 18 tarik Jylliew 2024, saw ngut ki dakait ryngkat ki tiar ialeh, kila wan da ka ar shaka Aprilia Scooty AS18J-0181 bad ka Bajaj Pulsar 220, AS18 E-7925 kila lute na ki briew da kaba pynap suloi haduh T. 80,000/-, nalor ki mobile.
Hynrei ha ka janmiet katei ka sngi, ki paidbah ka shnong Beldongpara hapoh ka PO Choto Matia kaba hap ha ka PS Krishnai, Goalpara, Assam kila ioh bat ia ka Pulsar 220 ha shnong Beldonpara, katba kitei dakaid kila lait phet.
Hadien kane, ki pulit ka Mendipathar Police Station hapoh ka jingialam u Dy.SP, Special Operation na North Garo Hills D.E.F ha 24 tarik Jylliew 2024, kila ioh kem ia uwei uba kyrteng kum u Sunil Boro, 33 snem na shnong Upper Borgum ka Goalpara district, Assam lem bad ka scooty.
Ha ka 1 tarik Naitung 2024, uwei uba la tip kyrteng kum u Turti Baumatary, uba dei na Buglamari hapoh ka PS Dudhnoi, Assam ula wan pyndem hi ha ki pulit ka North Garo Hills lem bad ka pistol. Hadien kane, ki pulit kila leit kem suk sa ia u Sahadev Basumatary na khappud ka Assam-Meghalaya hajan Tikrikilla, West Garo Hills. Mynta ki dang thwet sa ia u Kaltu Rabha na Dudhnoi, Assam.
Shah kem ki dakait na Assam ba wan lute ha Meghalaya, dang lait phet uwei
