Shillong: U nongialam ka Congress ha ka jylla, u bah Ronnie V Lyngdoh u la ong ba ka Congress kan pdiang sngewbha lada u nongialam barim jong ka party, u Dr. Mukul M Sangma un wan phai biang sha ka longïing ka Congress.
Haba kren sha ki lad pathai khubor, u bah Ronnie u la ong ba ka Congress ka pdiang lut iano iano baroh kiba kwah ban wan iasoh ym tang ia u Dr. Mukul, lada ki pdiang ia ka nongrim jong ka party.
Dang shen, u MP ka Congress na Tura u Saleng A Sangma ula ong ba ka party kam treh shuh ban khot biang ia u Dr. Mukul M Sangma lada u kwah ban wan phai ruh.
Hynrei u bah Ronnie u la ong ba kata ka dei ka jingkren jong u Saleng bad kan bha ban kylli na u hynrei ka party kan sa pyrkhat halor kane.
Ha kajuh ka por, u la ong ba watla ki don kiba la phet naka Congress, hynrei u la ju iakren iakynduh bad ki. U la ong ba ka jingleh bha ka party Congress ha kane ka elekshon MP kaba dang shu dep, kala khring ia kiwei ban phai khmat biang sha kane ka party kaba rim tam ha India.
Yn pdiang ka Congress arti arjat lada wan biang u Dr. Mukul bad ia kiwei ruh, ong u bah Ronnie
